مايكروسوفت تعلن عن تفاصيل التحديث الجاي لاكس بوكس ون، ويبدو ان فيه اضافات ممتازة

أفصحت مايكروسوفت عن تفاصيل أول تحديثات سنة 2015 لجهاز الإكسبوكس ون تحديث شهر فبراير. التحديث بينزل لجميع المستخدمين خلال شهر فبراير الجاي بدون تحديد يوم معين وهو متاح حاليا للمشتركين في خدمة ( Preview program ) لإختبار المزايا الجديدة في مراحلها التجريبية ( beta testing ).

التحديث يقتصر على ثلاث مزايا رئيسية وهي واجهات خاصة بالألعاب والخلفيات الخاصة القابلة للتعديل وتحديث خاص ببرنامج البث التلفزيوني الخاص بالجهاز.

الحين بيصير فيه واجهة خاصة ( Game Hubs ) مرتبطة بكل لعبة تختارها من الداشبورد (لوحة التحكم). الواجهات هذه بيكون فيها معلومات خاصة باللعبة زي عرض مقاطع فيديو للعبة وقائمة المتصدرين ( leaderboards ) ومعلومات عن النشاطات اللي يسوونها أخوياك في اللعبة.

أضافت مايكروسوفت إمكانية التعديل على الخلفيات الخاصة بإضافة خيار الشفافية على عناوين الداشبورد. يعني القوائم اللي تشوفها في الداشبورد بتصير شفافة شوي بحيث يعرض لك الخلفية بشكل أكثر من أول. عيب الداشبورد حق الجهاز أنه كبير ومليان أيقونات وقوائم وهذا يغطي بشكل كبير على الخلفية أو الصورة اللي مختارها الشخص كخلفية لجهازه لكن مع إمكانية تعديل شفافية عرض هذه القوائم تأمل مايكروسوفت أنه حلت ولو جزء بسيط من طريقة عرض الداشبورد اللي يشتكي منها البعض.

بالنسبة لتحديث تطبيق التلفزيون الموجود بالجهاز فأغلبه خواص ما تشتغل عندنا حتى الآن وما زالت مايكروسوفت تحاول تزيد عدد الدول المدعومة بهذه الخدمة. في هذا التحديث مايكروسوفت أضافت عدة دول جديدة وللأسف السعودية ماهي منها.

بهذي المناسبة أعربت مايكروسوفت عن حماسها لبداية السنة الجديدة وراح تستمر بدعم الجهاز بالتحديثات الشهرية في محاولة منها لتحسين الجهاز وانه يصير المنصة الأفضل للعب.

وش رأيكم شباب بمزايا التحديث الجديد؟ وكيف تشوفون دعم مايكروسوفت الشهري للجهاز؟ شاركونا أرائكم في التعليقات.