لاعب قدر يحسّن رسومات Watch Dogs بحركة بسيطة، ويوبيسوفت تعلّق على الموضوع

لاعب بي سي باسم The Worse قدر يعدّل رسومات لعبة Watch Dogs من خلال mod (تطور تجارب يسوونه اللاعبين) بحيث صارت رسوماتها قريبة من أول عرض شفناه للعبة -واللي أذهل الكثير-. العجيب في الموضوع ان التعديل ما كان يحتاج شي، كل اللي سواه موجود في اللعبة نفسها، بحيث تغيّر بعض الاعدادات الموجودة وخلاص!

اللي ما يعرف السالفة، لعبة Watch Dogs في أول عرض لها كان شكلها خرافي مرة والكثير انذهل من الرسومات، لكن مع الوقت اللاعبين بدأو يلاحظون ان رسومات اللعبة تنحدر شوي شوي مع كل عرض جديد للعبة، الين ما نزلت اللعبة وشافوا اللاعبين بنفسهم ان اللعبة فعلاً تختلف عن العروض اللي عرضتها يوبيسوفت، وصارت نقاشات كبيرة بخصوص هالموضوع.

يوبيسوفت، الشركة اللي سوّت اللعبة، علقت على الموضوع وقالت: “فريق التطوير عندنا مصمّم كل التصميم انهم يستخدمون الطاقة القصوى لكل الأجهزة، وسالفة اننا بالعاني نزّلنا رسومات اللعبة وجودتها بتكون مناقضة لأهدافنا. نسخة البي سي بالفعل احتوت على ملفات قديمة (وهي الملفات اللي استخدمها The Worse) ولكننا اضطرينا نلغيها لأسباب عديدة، أهمها انها بتأثر أداء اللعبة واستقرارها وجودة طريقة اللعب بشكل عام”.

يوبيسوفت مدحت اللاعب اللي سوّا المود هذا، وقالت انه انسان مبدع، لكنها قالت ان المود حقه يحسّن اللعبة من نواحي لكنه برضه يخربها من نواحي ثانية.

وش تعليقك أنت على هالموضوع؟ هل اللاعب هذا كشف يوبيسوفت على حقيقتها ولا تعتقد ان كلام يوبيسوفت منطقي؟