مشهور الدبيان
يمكن البعض لاحظ بعض التحديثات اللي صارت في الموقع في اليومين الأخيرة. سوينا بعض التحديثات في الموقع، وكملنا الباقي منها اليوم، وحبينا نبلغك وش سوينا بالضبط!
أبرز المواضيع في الصفحة الرئيسية
شخصياً من زمان ودي نضيف شي زي كذا، لكن خياراتنا سابقاً كانت سيئة وما فضّلنا نضيفها. لقينا أخيراً شكل بسيط وعملي لتسليط الضوء على 3 من مواضيع الموقع، بحيث يسهل عليك تعرف وش أهم المواضيع الموجودة في الموقع حالياً.
معلومات الكاتب في نهاية الموضوع
الآن بتلقى في نهاية كل موضوع في الموقع معلومات عن الكاتب، بالاضافة الى روابط لحساباته المختلفة. بعد هالتحديث بنبدأ نرجع ان شاءالله ننشر مقالات المتابعين، بحيث يستفيدون بشكل كامل من نشر مقالاتهم عندنا.
صغحة فريق العمل ما زالت غير محدّثة، لكن هالشي بيتغير قريباً جداً لاننا بنشيل كل اللي فيها ونحط شي جديد.
أوه صح .. وبتلقى بعد في نهاية كل موضوع روابط لمواضيع مشابهه ثانيه. شي بسيط بس مفيد.
ازالة تعليقات الفيسبوك
عدد الناس اللي كانوا يستخدمون تعليقات الفيسبوك كان قليل جداً جداً مقارنة باللي يستخدمون تعليقات الموقع، واكتشفنا مع الوقت عموماً ان تقسيم التعليقات يخلي متابعتها أصعب. فقررنا نشيلها مره وحده بدال ما تسوي للمتابعين زحمه على الفاضي.
اسم الموقع بالعربي
البعض راسلنا وهو مستغرب ليش فجأه حطينا اسم الموقع بالعربي جنب الشعار. السبب ببساطة أننا نبي أي أحد يدخل الموقع (مهما كانت لغته الانجليزية ضعيفة) يقدر يقرا أسمه صح بدون مشاكل، وحنا موقع عربي في النهاية!
تسريع اداء الموقع بشكل عام
احد الأشياء اللي كانت مخليه الموقع بطيء جداً هو الخلفية الثقيلة حقته. شلناها الآن واستخدمها خلفيه 75% أصغر حجماً، و 300% أجمل شكلاً. وسوينا بعض التحسينات في الكود اللي بترفع من اداء الموقع ان شاءالله، خاصة وقت اسئلة المستمعين كل سبت!
تحديثات للبودكاست
احد المشاكل اللي واجهناها بشكل ضايقنا قبل ما يضايق المستمعين مؤخراً في البودكاست هو تقطيع الصوت عند بعض افراد فريق العمل وقت التسجيل، وهالشي كان بسبب أن “السيرفر” في سكايب يكون عند واحد فينا. الآن راح نحوّل (بشكل تجريبي) الى برنامج TeamSpeak بحيث يكون السيرفر مستقل وبالتالي يتحسّن اداء الاتصال عند الجميع.
وفيه شي ثاني نبي نجربه لأنه كثير طلبوه مننا، بس نبيك تشوفه اذا نزلت حلقة البودكاست (يقالي اشوّقك).
هل هذا كل شي؟
هذا جزء بسيط من الاشياء اللي ناوين نسويها للموقع ولطريقة متابعة الأشياء اللي نسويها. فيه أشياء جميلة شغالين عليها وبتشوفونها قريباً ان شاءالله 🙂
ختاماً أحب أشكر كل اللي يرسلون لنا الملاحظات والاقتراحات بشكل مستمر لأنهم هم اللي يخلوننا نطوّر الموقع بأفضل شكل ممكن، وأيضاً أشكر الشاب الرهيب سهيل المزيني اللي ساعد بشكل كبير في تنفيذ أغلب التعديلات المتعلقة بالموقع. يبي ينبسط ترا لو ترسل له منشن في تويتر تشكره على شغله. 😛
بارعة
احمد خالد