محمد الشريف
لاعب صغير في السن في لعبة Destiny، يتم خداعه قدام جمهوره أثناء البث اللي مسويه على خدمة تويتش، ويتم حذف كل شخصياته اللي سوّاها.
هنري، اللاعب المسكين كان يسوّي بث على تويتش، وقال لجمهوره انه عنده واحد من أخوياه على شبكة بلايستيشن يبغى “يوريهم جليتش” في اللعبة يخلّيك ترفع مستواك -ليفلك-. صاحب هنري اللي اسمه على الشبكة KirmitTHEfrog، عنده شروط عشان يسوي الجليتش، قاله لازم تعطيني التحكم في لعبتك عن طريق ميزة “مشاركة اللعب” الموجودة في بلايستيشن 4- وهي ميزة تخلّيك تعطي التحكم للاعب ثاني- والشرط الثاني انك تقوم وتطلع من الغرفة عشان ما تشوفني وش أسوي، تقدر تقول انه سر.
هنري ما يعرف وشي شير بلاي أو مشاركة اللعب، فراح كيرميت ذا فروق شرح له اياها، وافق هنري الضحية وأعطاه التحكم وطلع برا الغرفة. تفاجأ الجمهور ان كيرميت ذا فروق رجع للقائمة الرئيسية في اللعبة وبدأ يحذف شخصيات هنري. شخصية ليفلها 31، وشخصية ليفلها 26 كلهم تم حذفهم، وبعدها دخل الى الشخصية الثالثة وحذف سلاح من نوعية Exotic وهذا النوع من الأسلحة يعتبر نادر.
أم هنري، اسمها كيرتني، رفعت الفيديو على قناتها في يوتيوب عشان العالم يشوفون اللي صار. عشان نختصر عليك المقطع، رح للدقيقة 13 وابدأ تفرج من هناك.
“مثل ما تشوفون في الفيديو، ولدي هنري تم تدميره” تقول كيرتني الكلام، وأرسلت المقطع الى مطوّر اللعبة Bungie لعل وعسى يسوون شي.
للأسف، بنجي يقولون انهم ما يقدرون يسوون شي، لان عندهم قوانين ولا يبغون يتجاوزونها. في صفحة “الأسئلة الشائعة” للعبة، مذكور:
” رجاءً كونوا حذرين في استخدامكم لميزة مشاركة اللعب في ديستني”
تكلمت بنجي عن الحادثة في تحديثهم الأسبوعي للمدونة، وهذا الشي استغربته كيرتني أم هنري. تقول كيرتني:
“توقعت ان بنجي بتشوف الفيديو وترد علينا، لكني تفاجأت انهم حطوه في موقعهم، وانفجر الانترنت ضدي وصاروا الناس يقولون علي اني أم سيئة واني غبية”.
الموضوع توقف بهذي الصورة الى الآن، عدد المشاهدات للفيديو تجاوزت النص مليون. بنجي تعرف السالفة ولكن تقول ان عندها قوانين ما تبغى تكسرها عشان حالة وحدة، ولا تشوف ان هذي حالة استثنائية.
أما بالنسبة لهنري، فالولد رجع يلعب ديستني، ويقول انه اخوياه يساعدونه الآن، وانه قدر يخلص Crota’s End (أصعب مهمة في اللعبة) وقدر يحصل على واحد من أقوى مسدسات اللعبة، Word of Crota.
وش رأيك أنت في الموضوع؟
بارعة
احمد خالد
