محمد الشريف
اذا كنت من معجبي لعبة ذا ووكينج ديد (The Walking Dead)، ومتابع أخبار الألعاب في الفترة الأخيرة، فلا بد انك شفت تويت -وفي رواية أخرى تغريدة- المطوّر الرسمي حق اللعبة، واللي أعلنوا فيها عن موعد الموسم الثاني للعبة.
لعبة ذا ووكينج ديد، أو “الميّتين اللي يمشون” على قولة صاحبنا ابراهيم خليل، لعبة رائعة من نواحي كثيرة، خصوصاً في القصة، ورواية القصة وتقديمها للاعب، ورسوماتها الكرتونية الجميلة، بالاضافة الى حواراتها الرائعة.
لكن مافيه شي كامل، والكامل وجه الله. اللعبة عانت من مشاكل كثيرة وللأسف واضحة. أولها كانت التحكّم والاخراج اللي كانت سيئة بشكل مرعب. كثير من اللقطات في اللعبة تعلّق على نهاية المشهد لثواني عديدة، وبعدين تنتقل للمشهد اللي بعده. هذا من غير ذكر الكاميرات السيئة أثناء اللعب، واللي بعض الأحيان تميل بشكل استعراضي جيّد شكليّاً، لكن من الناحية العمليّة سيء وأثّر سلبياً على تجربتي للعبة.
أما التحكم فحدث ولا حرج، اللعبة – على الأجهزة المنزليّة – كانت تعاني من تحكم غريب عجيب، لا زلت أتهوّل كل ما أذكر اني أمشي بعصا التحكّم اليسرى وفي نفس الوقت لازم أكون حاط اصبعي على عصا التحكم اليمنى عشان أقدر أنتبه للأشياء اللي أقدر أتفاعل معها. طبعاً هذا كلّه على جنب واذا حطّوك في لقطة سريعة وطلبوا منك تطلق على الأعداء على جنب ثاني.
عموماً، ما أقدر أطالب استديو تطوير صغير بأنه يقدم لي لعبة بجودة الألعاب المعروفة، خصوصاً وان ميزانية المشروع كانت قليلة. اللي سووه استديو التطوير كان انجاز خرافي لهم، كثير من اللاعبين حبّوا اللعبة بشكل كبير جداً، لدرجة اني لاحظت كثير منهم صار يتعاطف مع اللعبة ويتسامح مع كل عيوبها، ويدافع عنها كأنه مسئول عنها، وهذي اشارة قوّية لنجاح أي لعبة، أو حتى أي منتج!
مثل ما قلنا في بداية المقالة، اعلان الموسم الثاني خلاص على الأبواب. هذي بعض النقاط اللي أتمنى من استديو التطوير انه انتبه عرفها وحلّها:
- اعادة النظر في طريقة اللعب من الصفر.
- تحسين الاخراج وأماكن وضع الكاميرات.
- اعتناء أكثر بطريقة حركة بطريقة الأشياء (animations) خصوصاً الشخصيات، وبشكل أخص أكثر تعبيرات الوجيه (facial animations).
- الاعتناء أكثر للأخطاء التقنية، مثل مشاكل التخزينات (save files) اللي انتشرت على نسخة البلاي ستيشن 3.
أخيراً، اللي لعب The Wolf Among Us (وهي من تطوير الاستديو نفسه) بيلاحظ انه تجاوز أغلب المشاكل اللي ذكرتها. أتمنى انهم يطبقون كل هالتعديلات على الموسم الثاني من ووكينج ديد، خصوصاً وانهم ما طبقوا من هالملاحظات شي في الحلقة الأخيرة days 400!
ايش المشاكل اللي تتمنى تشوفها محلولة في الموسم الثاني من سلسلة ووكينج ديد؟ شاركنا برأيك في التعليقات!
أيمن اليغشي
احمد خالد
