مخرج The Last of Us يدوّر أفكار للجزء الثاني

في مقابلة مع المخرج الابداعي للعبة الاسطورية The Last of Us، تكلم نيل دركمان (Neil Druckmann)  عن مواضيع مهمّة وكثيرة، أهمّها مشروعهم الجاي واحتمالية انه يكون اما لعبة جديدة كلياً، أو جزء ثاني للعبة ذا لاست أوف أس.

تكلم نيل أولاً عن الاضافة المنتظرة للعبة، وهي Left Behind. يقول نيل:” انتهينا اضافة ليفت بيهايند، اشتغلنا على هاللعبة أنا والمخرج بروس ستريلي (Bruce Straely) لمدة أربع سنوات. جا وقت الراحة الحين، نحتاج نستعيد طاقتنا من جديد”.

تكلم برضو نيل عن بعض المشاريع الجاية، يقول:” حنا حالياً نمر بمرحلة العصف الذهني لمشاريعنا الجاية، وعشان أكون صريح معكم، واحد من هالمشاريع هو جزء ثاني لذا لاست أوف أس، وواحد ثاني منها هو مشروع تكوين لعبة جديدة كلياً. قضينا الأسابيع الأخيرة وحنا نسوي عصف ذهني للعبة جديدة، نحتاج نتقدّم شوي ونشوف وش يطلع معنا. هذي هي الطريقة اللي اشتغلنا فيها مع اضافة ليفت بيهايند”.

أخيراً، تكلّم نيل عن احتمالية اصدار ذا لاست أوف أس على بلاي ستيشن 4، يقول نيل:” مواردنا محدودة، ولازم نكون منتبهين وين نستخدم هالموارد. هذا سؤال يتعلق بحدسنا وتوقعاتنا بخصوص وش يبغون الناس، وايش أفضل شي نقضي أوقات عملنا فيه. هذا شي نقدر نستنتجه مع الوقت”.

مقابلة احتوت على اجابة الكثير من الأسئلة اللي كنا ننتظر أجوبة لها! لكن الأجوبة، مثل ما كان متوقّع، ما كانت صريحة ومباشرة.

شخصياً، أنا أقف ضد صنع جزء ثاني لذا لاست أوف أس، التجربة اللي عشتها مع ذا لاست أوف أس (وقصتها بالذات) تخليني أحس ان أي اضافة للعبة راح يضرّها. اضافة اللعبة اللي بتجي كنت متخوّف منها، لكني ارتحت لمن عرفت ان أحداثها بتكون قبل الأحداث الأساسية.

برضو أقف ضد موضوع اصدار ذا لاست أوف أس على البلاي ستيشن 4، لان مثل ما ذكر نيل دركمان ان مواردهم محدودة، بالاضافة الى ان وقتهم محدود. أفضّل انهم يشتغلون على لعبة جديدة، على انهم ينقلون لعبة ختمتها 7 مرّات وجبت البلاتينيوم فيها، بس عشان ألعبها مرة ثانية برسومات أفضل.

وش رايكم بكلام نيل؟ وش تتمنى يكون مشروعهم الجاي، جزء جديد لذا لاست أوف أس ولا لعبة جديدة كلياً؟