مطوّري لعبة Angry Brids يردون على لعبة Flappy Bird بلعبة تشبهها

وكأننا ناقصين ألعاب تشبه فلابي بيرد. أطلقت روفيو (Rovio) مطوّر اللعبة المعروفة آنجري بيردز (Angry Birds) لعبتها الجديدة باسم ريتراي (Retry)، وهي لعبة فيها شي كبير من… خلونا نشوف الفيديو ونحكم هل هم نسخوا فلابي بيرد ولا تختلف عنها.

نزلت اللعبة في عدد معين من الدول فقط الى الآن. لعبة ريتراي تحتوي على نفس العناصر اللي انتشرت فيها فلابي بيرد: طريقة لعب سهلة ولكنها تنرفزك بما انك كل شوي تموت وتعيد. الفرق في هذي اللعبة انك تلعب بطيارة بدال الطير، بالاضافة الى بعض الميزات اللي أضافوها.

أول الميزات هذي ان اللعبة فيها نقاط تخزين أو Checkpoints بحيث اذا فشلت تقدر تعيد لعبك من المكان اللي وصلته، أو مكان قريب منه. الميزة الثانية انك تجمع قروش وانت تلعب، القروش هذي تقدر “تدفعها” اذا جيت تعيد اللعب من نقطة التخزين، واذا ما عندك قروش كافية، بامكانك تشتري القروش هذي بفلوس حقيقية.

فيه مراحل متنوعة في اللعبة، عكس فلابي بيرد. فيه عندك مراحل صيفية وشتائية ومستقبلية وغيرها، كل هذي تقدر تشتريها برضه. العالم الأخير تقدر تشتريه بسعر 18 جنيه استرليني، يعني حوالي 114 ريال سعودي!

اللعبة مصيرها بتنزل في كل الدول، لكن كثير من ألعاب الجوال تنزل في عدد معين من الدول عشان ياخذون من الناس الأخطاء اللي اكتشفوها في لعبتهم ويصلحونها، وبعدها ينزلونها في باقي دول العالم.

وش رأيك في لعبة ريتراي؟ هل تشوف انها نسخ عيني عينك للعبة فلابي بيرد، ولا لها فكرة مطوّرة منها؟