وش سالفة اللعبة
هي لعبة RPG بالأسلوب الغربي، واللي غالبًا تشمل عناصر مثل عالم مفتوح يحتوي على قصّة فيها خيارات يحددها اللاعب بحيث يشوف نتايج أحداثها، وتكون القصة غامضة وقاسية في أحداثها، وشخصياتها جديّة. سلسلة ذا ويتشر تحكي قصة Geralt of Rivia، وهو ويتشر (أشخاص عندهم قدرات خارقة)، تشرح لك السلسلة كيف حياة الويتشرز الصعبة. الجزء هذا هو الجزء الثالث والأخير، بما انها ثلاثيّة.
معلومات اللعبة
الايجابيات
- باستثناء بعض الكلمات، النسخة العربية للعبة تحمل أفضل عمل عربي في الألعاب من ناحية الترجمة. اذا عندك مشكلة في اللغة الانجليزية، فأقدر أضمن لك انك بتفهم اللعبة بالكامل اذا لعبتها باللغة العربية.
- من أجمل ألعاب العالم المفتوح. كل شي في اللعبة حي: القرى والشخصيات اللي فيها والحياة الطبيعية اللي يسوونها، الموسيقى الرائعة اللي تشغل وأنت تلعب، يارجل حتى الأشجار البعيدة تلاحظ حركتها!
- أفضل لعبة قدمت لي نظام اختيارات في القصة (morality system). في بعض المواقف في اللعبة، كنت أحتار كثير في اتخاذ قراري، واللي كنت واعي تمامًا ان تأثيره بيكون هائل ومفصلي على أحداث اللعبة. في آخر جلساتي مع أصدقائي الجيمرز، كنا نتفاجأ في نتايج القرارات اللي اتخذناها.
- من أفضل القصص اللي لعبتها بشكل عام. القصة وأحداثها، والشخصيات العميقة اللي تعطيك انطباع ان مافيه أحد طيّب أو شرّير بشكل مطلق، ولكن كل شخصية تمشي ورا مصلحتها.
- مهمات جانبيّة عميقة وتمتد معك الى فترات بعيدة. وحدة من المهمات الجانبية كانت تطلب مني فقط اني أساعد شخص ضد الوحوش اللي كانت تبي تاكله، بعد ساعات، انتهت فيني الأحداث الى انه فتح محل خاص فيه ويبيعني أشياء بمبلغ مخفّض!
- أسلوب كتابة رائع. بتلاحظ في اللعبة ان الفلاحين وعامة الناس جاهلين وغير متعلمين، بحيث تلقاهم يتحدثون بلغة انجليزية فيها أخطاء لغوية (we was و I knowed).
- نظام التطوير والتقدّم في اللعبة ممكن بطيء، ولكن دقيق ويحسّسك بقيمة التطوّر اللي تسويه. طريقة رفع ليفلك صعب، لدرجة ان كل نقطة تطوير تحصل عليها تفكّر وين تبي تستخدمها بالضبط.
- أضخم محتوى شفته في الألعاب، وأفضل محتوى. على اني لعبت فوق 70 ساعة، الا ان اللعبة لا زال فيها مهمات كثيرة ما خلصتها.
السلبيات
- بشكل عام، اللعبة من الناحية التقنيّة فيها عيوب كثيرة. لا تستغرب اذا صارت لك أشياء غريبة في اللعبة: واحد من الوحوش فجأة دخل وسط جدار وتعلّق فيه، الأعداء ممكن يهاجمون الخيل ويتركونك ولا كأنك موجود، شخصيتك تدخل في أماكن غريبة وتتعلّق فيها… الخ.
- بشكل عام، اللاعبين اللي يلعبونها لأول مرة بيواجهون صعوبة في فهم الأحداث السابقة للقصة. كثير من الشخصيات اللي كانت رئيسية في الاجزاء السابقة بتقابلها في الجزء الثالث وكأنها -للأسف- مجرد شخصيات عابرة لا أكثر.
- نظام قتال بدائي. طريقة قتال الاعداء ما فيها شي جديد: ضربة خفيفة، ضربة قوية، ضربة سحرية… الخ. غالبًا كل اللي كنت أسويه اني أضرب العدو ضربتين خفيفة بعدين أرجع على ورا عشان ما يضربني، بعدين أضربه ضربتين… وهكذا الين يموت.
- مثل أغلب ألعاب العالم المفتوح، التعليمات في البداية كثيرة ومنفّرة. في أول ساعتين أو ثلاث في اللعبة، بتلاحظ ان معظم اللي تسويه ماهو لعب، ولكن مجرد قراءة لقطع كلام طويلة ومملة عن كيف تسوي الشي الفلاني.
- السباحة في اللعبة سيئة للغاية. كثير من المرّات أطلب من الشخصية انها تغطس في المويه لكنه يغطس ويطلع بشكل غريب ومزعج.
- التحكّم بالخيل من أسوأ تجاربي في اللعبة. أكون ماشي على الطريق وفجأة ألقى الخيل قرّر انه يلف -وبشكل مفاجئ- برا الطريق. أضف الى هذا ان في كل مره أوصل عند جسر يوقّف من نفسه، وأجلس ألف يمين ويسار على خفيف عشان أخليه يكمل طريقه.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
سلسلة The Witcher دائمًا تركّز على القصة والشخصيات والاختيارات اللي تقدمها للاعب، وفي هذا الجزء وصلت لأعلى مستوى لها في كل هذي العناصر. الى يوم كتابتي لهذي الكلمات، ما فيه لعبة قدّمت لي هذي العناصر بشكل أفضل. من ناحية طريقة اللعب، فاللعبة ما قدرت تقدم لي تجربة مثالية، لكن بسبب العناصر الثلاثة اللي ذكرتها قبل، قدرت أتجاوز كل مشاكل اللعبة، وفعلًا بعد ما أنهيتها حصلت على تجربة استثنائية ما أعتقد بأعيشها في السنوات القادمة.
ألعاب مشابهة
- Dragon Age: Inquisition (من ناحية العالم والاختيارات في القصة).
- The Elder Scrolls V: Skyrim
- Bound by Flame
فيديو اللعبة
