الايجابيات
- جرافيكس خرااااافي. من اجمل الاشياء اللي شفتها على البلايستيشن هذا اذا ما كانت الاجمل. شيء مبهر جداً جداً.
- بيئات مصمّمة بشكل رائع وواقعي، خاصة الاماكن اللي فيها زحمة. اهتمام كبير بالتفاصيل الصغيرة، خصوصاً بالمحادثات اللي تصير بين الناس وتكون عادة مضحكة أو حتى تفيدك في المهمة.
- اغتيالات تبرّد القلب. واعجبني تحديداً توفير عدة طرق لاخفاء (او التخلّص من) الجثث.
- خاصية Point Shooting الجديدة اللي تتيح لك تقتل أكثر من شخص بسرعة خارقه. المؤثرات حقتها رهيبه وتفك ازمه في مواقف كثير.
- طور Contracts فكرته جميله، ويسمح لك تغيّر في الاهداف اللي المفروض تغتالهم في مراحل القصه، وتتحدى اخوياك يغتالون هالاهداف اللي اخترتهم لهم بنفس الطريقه اللي اغتلتهم انت فيها. بيطوّل لك من عمر اللعبة، خاصة اذا كانوا اخوياك متحمسين مره للعبة.
السلبيات
- مراحل خطيّة بشكل مقرف (يجبرونك على مسار معيّن). تحس مصممين المرحله وهم حريصين كل الحرص انك تصير فنّان في النهاية. صحيح انك تقدر تخلص المهمة باستخدام اكثر من طريق، بس كل طريق مصمّم بشكل خطّي بعد. يعني كاني اقول لك اختار اي مطعم تبي بس انا بختار لك الوجبه، ما استفدنا شي. وكل مرحله مقسمة الى اجزاء صغيره، اذا خلصت واحد ما تقدر ترجع للي قبله.
- الذكاء الصناعي ابو كلب. تقدر مثلاً تاخذ قاروره من جنب واحد وترميها بعيد وبيروح يشوف وش هالصوت. ولو قررت تخربها وتدرعم في المرحلة (بدال التخفي) بتكتشف ان اعداء كثير يصرّون انهم يطلقون عليك حتى لو هم داخل بيت او ورا جدار كبير ما يسمح لهم يطلقون عليك اصلاً! مثالين فقط من امثلة كثيرة مرت علي.
- قصة سخيفة جداً ومالها اي سنع وتقدر تتوقع اغلب احداثها. واللي زاد الطين بله ان الاخراج تعيس، وحاولوا يتفننون بكم لقطه بس النتيجه تجي عكسية. تحس التوجه اجّمالاً في هذا الجزء هو تحويل اللعبة الى فلم أكشن رخيص.
- لعبة سهلة جداً. عندك خاصية الغريزة (instinct) الجديدة اللي تكشف لك كل شي تقدر تستخدمه حولك وتوريك اعدائك لو كانوا ورا الجدران + ذكاء صناعي سيء + تصميم خطّي للمراحل يسهّل لك التخفّي + الانتقال من جزء الى جزء في المرحله يرجعك متخفي وماحد يدري عنك حتى لو انكشفت قبل كذا.
- خاصية الغريزة بالاضافة الى قائمة “التحديات” اللي تقدر تشوفها في كل مرحلة بيكشفون لك كل الطرق اللي تقدر تقتل فيها ضحيتك، ويشيلون المتعة من انك تستكشف هالاشياء بنفسك.
- لعبت الاجزاء السابقة من Hitman؟ اذا ايه، تذكر الموسيقى الرهيبه اللي تلقاها بكل جزء؟ اذا ايه، فانسى تلقاها هنا. Jasper Kyd اللي سوا موسيقى الاجزاء السابقه ما اشتغل معهم في هالجزء. او بالأصح الشركة ما طلبته يشتغل معهم.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
نعم انا من عشّاق سلسلة Hitman، لكن مع ذلك حرصت اني ما اقيّمها كلعبة Hitman لعلمي ان ناس كثير بيكون هذا اول جزء لهم. لكن مع ذلك اللعبة فيها عيوب كبيرة، وواضح توجّه الشركه (المبالغ فيه) في انها تحاول تخلي هاللعبة ملائمة للي مالهم اهتمام كبير بالالعاب. اذا كان اهتمامك بسيط في الالعاب، فاتوقع بتعجبك مره لانها مصمّمة لك اصلاً. اذا كنت تعشق العاب التخفّي واللعب بروقان، فغالبا بتلقى الجرعة اللي تحتاجها من العاب التخفي وبتستمتع فيها. اما اذا كنت من عشّاق سلسلة Hitman فالعوض على الله.
ألعاب مشابهة
- Splinter Cell
- Metal Gear Solid
فيديو اللعبة
