الايجابيات
- طريقة لعب بسيطة وسهلة أي احد يتعلّم عليها بدون ما يحتاج يحفظ حركات، وبنفس الوقت ما يخرّب هالشي على اللاعبين المتقدّمين اللي بيحتاجون يتعلمون تكتيكات كثيره وسرعة بديهة للتغلب على المنافسين.
- شخصيات كثيره واغلبها أول مره نشوفها في لعبه قتاليه. وواضح حرص المطوّر انه اللعب بالشخصيات يكون اقرب شي ممكن لهذي الشخصيات في العابها المستقله.
- لعبه جداً ممتعة اذا كنت بتجتمع مع اخوياك او اهلك وتلعبونها سوا في نفس المكان. تسليك في البيت او الاستراحه او اي مكان تجتمع فيه مع ناس ثانيين مهتمين باللعبة.
- لعبتين بقيمة لعبه وحده! اذا اشتريت نسخة البلايستيشن من اللعبة بتجيك معها نسخة الفيتا تحملها ببلاش بدون زياده في السعر!
- بامكانك تلعب اللعبه على البلايستيشن وتكمل لعبك على الفيتا بشكل تلقائي وسلس بدون ما تسوي شي. وتقدر تلعب اونلاين بالفيتا حقك مع لاعبين البلايستيشن والعكس. والحلو في الموضوع ان جرافيكس نسخة الفيتا قريب جداً من نسخة البلايستيشن.
السلبيات
- طور القصة ممل وسهل بزيادة، خلصته اول مره بدون ما اموت ولا مره. حتى الرئيس الاخير ما تتضارب معه مباشره، بيطلّع لك نسخ من شخصيات اللعبه تتضارب معها بداله! المشكله تحتاج تلعب طور القصه بالشخصيات عشان تفك اشياء اضافية.
- نظام القتال اللي استخدموه يقلل من حماس القتال بشكل كبير. الفكرة انك تضرب اعدائك لين تجمّع الطاقه الكافيه اللي تسمح لك تنفّذ الحركة الخارقة حقت شخصيتك، وبالتالي تصرف كل الطاقه اللي جمعتها. كل ما تجمّع طاقه اكثر كل ما انتقلت الحركة الخارقه حقتك الى مستوى اعلى وأقوى (ثلاث مستويات وثلاث حركات مختلفه). المشكله ما تقدر تقتل اي احد الا عن طريق الحركة الخارقه هذي! يعني الحماس مقتصر على الخوف من الحركات الخارقه هذي بس. عدا ذلك بتلقى اللاعبين يضربون في بعض بشكل عشوائي و”مستعجل” عشان يجمعون طاقه بسرعه تعطيهم حركه خارقه ينهون فيها احد الخصوم (او كلهم، حسب مستوى الحركه). والمشكله الاعظم انك اذا قتلت احد ما تروح الطاقه اللي معه! يعني اذا كانت عنده حركة خارقه، فيقدر ببساطه يرجع يكمل اللعب بعد ما تقتله ويقتلك من اول ضربه.
- كل مرحلة من المراحل هي عباره عن خليط من لعبتين. يعني تلعب مثلاً في مرحلة God of War، فجأه بنص اللعب يدخلون لك شخصيات وبيئة Patapon في السالفه. فكرة ظريفة نظرياً، لكن فعلياً تطلعك من جو المرحلة، وتحوس أبو الجو عليك.
- الواجهة والقوائم وطريقة عرضها قبيحه وبدائيه ما تليق بلعبة تعتبرها سوني احد أكبر العابها هالسنه.
- كنت اتمنى لو اني اقدر استخدم الفيتا كيد تحكّم اضافية لو احد جا عندي ويبي يلعب بس ما عندنا يد تحكم زايده له. يبدو انه ما تقدر تستخدم الفيتا للعب على البلايستيشن الا عن طريق الاونلاين. والأسوأ انه لازم الحساب اللي على الفيتا يكون غير اللي على البلايستيشن (عشان ترسل له دعوه)، فما تقدر تستخدم الفيتا حقك لان سوني العبقريه قررت تخلي اجهزة الفيتا مرتبطه بحساب واحد فقط. ان شاءالله يصلحون هالشي عن طريق تحديث.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
اذا كنت ناوي تلعب هاللعبه مع مجموعة ناس في نفس المكان (البيت، المدرسة، الملحق، الاستراحه...الخ) فبتكون لعبه ممتعه وتستحق انك تشتريها. اما اذا كنت بتاخذها عشان تلعب اونلاين او تفك اشياء في طور القصه او تخلص التحديات اللي موجوده في اللعبة، فبتمل منها بسرعه، خاصة مع نظام القتال اللي ما يسمح لك تقتل خصمك الا عن طريق الحركة الخارقه فقط.
ألعاب مشابهة
- Super Smash Bros.
فيديو اللعبة
