يزيد السويري
أخيرا أضافت شاركة كابكوم طور اللعب التعاوني المحلي بالشاشة المنقسمة لنسخة البي سي من لعبة Resident Evil Revelations 2 على ستيم.
بعد المرمطة اللي صارت واللي أضطر فيها أحد المبرمجين “modder” يضيف هذا الطور بشكل غير رسمي للعبة. الآن كابكوم أطلقت هذا التحديث اللي يخليك تلعب مع أحد على نفس الجهاز بوضع انقسام الشاشة على شكل بيتا مفتوحة في ستيم ويقدر أي واحد عنده اللعبة يجرب التحديث.
طبعا بما أن التحديث يعتبر بيتا إختبارية صرحت كابكوم بهذا الخصوص وقالت:
“حنا نبي ننزل هذه الميزة للاعبي البي سي في أقرب فرصة ممكنة لذلك هذا التحديث يمكن ما يشتغل بنسبة 100 بالمئة حاليا. ردود الأفعال والإنطباعات للي جرب التحديث مرحب بها. في حال ما كنت راضي بهذا التحديث تقدر تسترجع فلوسك عبر ستيم”.
طريقة تفعيل الميزة يبيلها تعب شوي بما ان الميزة ما زالت في مرحلة البيتا. هنا بأسرد لكم طريقة تفعيلها باختصار:
بالنسبة لطور القصة “Campaign Mode” إشبك يد تحكم عادية وأضغط زر START على يد تحكم اللاعب الثاني إذا بدا اللعب وبتنقسم الشاشة وتصير تقدر تلعب مع أي أحد على نفس الجهاز. في حال انهيت اللعبة أو طلعت للقائمة الرئيسية بترجع اللعبة تلقائيا لوضع الشاشة الكاملة.
أما بالنسبة لطور الريد “Raid Mode” نفس الطريقة إضغط زر START على يد تجكم اللاعب الثاني في المنطقة اللي تشبه الغرفة فيها لوحات وصور في كل مكان (the staging area) وتكون تمشي بشخصية مخططة بأخضر وراح تنقسم الشاشة. بعدها يمدي كل واحد يختار شخصيته ويضبط أسلحته وبعدين تختار مهمة الريد اللي تبيها بشكل طبيعي. طبعا في حال انهيت اللعبة أو طلعت للقائمة الرئيسية بترجع اللعبة تلقائيا لوضع الشاشة الكاملة.
تقييمنا لهذي اللعبة بيتأخر، لكن محمد الشريف كتب لنا انطباعاته عنها.
وش رأيكم شباب بحركة كابكوم وهل تتوقعون حركة المودر هي اللي خلت الشركة تنزل الطور هذا بدري رغم أنه موب جاهز تماما؟ شاركونا ارائكم في التعليقات.
محمد عاشور
أحمد قربان
