يزيد السويري
شرح الرهيب فيل سبنسر رئيس قسم إكسبوكس في مايكروسوفت هدف وجود شرط التكافؤ (Parity Clause) في سياسة الشركة مع ألعاب المطورين المستقلين على جهاز الاكسبوكس ون، واللي تتطلب أن المطورين ينزلون ألعابهم على الإكسبوكس ون بنفس الوقت اللي تنزل فيه على الاجهزة الثانية عشان ما يحسون ملاك الجهاز بأنهم أقل من غيرهم وقال:
” اللي شايل همه هو لما أشوف الناس اللي شرت الجهاز وكيف أنهم استثمروا وقتهم وفلوسهم في الجهاز ما أبيهم يحسون بأنهم أقل من غيرهم لأنهم يستاهلون. لما تنزل لعبة من شركة طرف ثالث فهي تنزل بنفس الوقت على جميع الأجهزة وأبي نفس الشيء يصير مع ألعاب المطورين المستقلين”.
“بالنسبة لي المساواة هي لما تكون أنت أحد ملاك لجهاز الاكسبوكس ون أبي أضمن أن الالعاب اللي ممكن تنزل على الاكسبوكس ون بالاضافة للاجهزة الثانية تنزل على جهازك في نفس الوقت مع أصحاب الاجهزة الثانية”.
” ما أبي مطور يجي ويقول بسوي لعبة على الجهاز الفلاني وبنزلها على الاكسبوكس بعدين وقت ما أبي، لأني أحس أنه هذا التوجه خاطئ. لكن بما إننا مستخدمين لجهاز الاكسبوكس ون نبي الالعاب الرهيبة تنزل على الجهازين. لكن أقدر أتفهم قرار بعض المطورين أنهم ما عندهم الوقت الكافي أنهم ينزلون اللعبة بنفس الوقت على الجهازين ساعتها نتناقش معهم على خطط بديلة وأنا مبسوط بهذه الطريقة”.
شرط التكافؤ هذا له عيوب ومزايا يعني يا أما ان اللعبة تنزل على كل الاجهزة بالتساوي أو على الاقل تنزل بشكل حصري أو أنها ما تنزل خير شر. هذه السياسة كانت موجودة من أيام الاكسبوكس 360 عشان كذا كنا نشوف ألعاب أركيد كثيرة حصرية على الجهاز. لكن المبشر في الموضوع أن السياسة هذه صار فيها نوع من الليونة والسلاسة في التعامل مع المطورين والبحث عن حلول بديلة والفضل طبعا بعد الله هو وجود شخص برهابة أبو سبنسر ماسك قسم الإكسبوكس.
وش رأيكم أعزائي بكلام أبو سبنسر حول موضوع شرط التكافئ؟ شاركونا أرائكم في التعليقات.
Saudi Gamer
احمد خالد
