محمد الشريف
الكل يعرف ان فيه ناس زعلانين من سالفة شراء فيسبوك لجهاز الواقع الافتراضي أوكيولوس ريفت (Oculous Rift)، لكن الظاهر ان فيه ناس زعلانه من جد وقررت تاخذ الموضوع بشكل أكبر.
يقولك الوسيم اللي في الصورة، بولمر لوكي (Palmer Luckey) ان وصلته تهديدات بالقتل له ولعائلته، يقول لوكي:” توقعنا ان بيكون فيه ردة فعل سلبية تجاه هذا الموضوع”.
فعلاً شفنا ردود أفعال سلبية، وكثيرين قالوا ما راح نشتري الجهاز بسبب فيسبوك وشراءه لها. التهديدات وصلت الى حد حقيقي، وهو التهديد بالقتل. يقول لوكي:” ما توقعنا ان توصلنا تهديدات بالقتل لنا ولعوائلنا. حنا واثقين بأنفسنا وان ردنا بالأفعال ماهي بالكلام، لكن هذا النوع من التهديد غير مسموح، خصوصاً وانه وصل لنا ولعوائلنا اللي مالهم علاقة بالسالفة”.
برضه يقول لوكي انه بشكل عام ماهو مهتم مرة بسالفة التهديدات، يقول لوكي:” هدفي الأول هو اني أشوف نجاح الواقع الافتراضي (Virtual Reality)، ولا راح أهتم كثير بردود الأفعال هذي”. أحس لوكي قالها وهو يتخيّل نفسه ماسك مايكروفون ويقول هالجملة بنبرة حماسية، والحضور قدامه يصفقون ويصارخون من قوّة الولد.
الحقيقة اني ماني مهتم كثير بالواقع الافتراضي بكبره، عكس الناس كلها. لكن يهمني اني أشوف تطوّرات هذا الجهاز بما ان الكثير يقول انه راح يغيّر عالم الألعاب. متحمّس أشوف وش بيسوي، هل من جد بيغيّر عالم الألعاب، ولا بيسوّي نفس الضجة الاعلامية حقت كينيكت وبلاي ستيشن موف، اللي قالوا انهم بيغيرون عالم الجيمز للأبد، وشفنا كيف ان الكلام هذا طلع غلط.
وش رأيك في الموضوع؟ هل تشوف ان سالفة التهديد بالقتل ردة فعل طبيعية؟
بارعة
احمد خالد
أيمن اليغشي