سنة جديدة، موقع جديد كلياً!

في 9 يناير 2014، كمّل الموقع 5 سنوات من يوم اطلاقه. وبدال ما نحتفل بهالشي، قررّنا نحط كامل جهودنا في تطوير تجربة متابعينا بشكل جذري، ونسوّي تصميم جديد متقدّم يناسب محتوى وتوجّه الموقع، ويسهّل لنا تطويره مستقبلاً بشكل كبير. تقدر تعتبره الجيل الجديد من سعودي جيمر مع صدور أجهزة الجيل الجديد.

في هذا الموضوع بستعرض لك أهم التطويرات والاضافات اللي بتلقاها في الموقع:

صفحة رئيسية احترافية

انتقلنا من أسلوب عرض المدوّنات إلى أسلوب أكثر احترافية يعرض لك أهم المحتويات بشكل عام في الجزء الأعلى، ثم آخر المقالات والفيديوهات، ثم آخر التقييمات، ثم آخر حلقات البودكاست. وبكذا تصير تلقى نوع المحتوى اللي يهمّك بسرعة!

تطوير كبير للتقييمات في الموقع

طوّرنا طريقة عرض التقييمات وخليناها أجمل بكثير من أول، وأضفنا لها عدة معلومات كان المتابعين يطلبونها مننا دائماً مثل عمر اللعبة، وهل تحتاج انجليزي ولا لا، ونوع اللعبة. تقييم Republique يمثّل الشكل الجديد للتقييمات. التقييمات اللي قبلها راح تكون فيها الصور أصغر شوي. التقييمات القديمة اللي ما عاد احد يقراها بتكون فيها معلومات ناقصه عن اللعبة (لأن ما كنا نحطها في التصميم القديم) بس راح نعبيها مع الوقت.

مو بس كذا، حتى في صفحة التقييمات بيصير بامكانك تفلتر التقييمات حسب نوع اللعبة وحسب الجهاز وحسب التقييم، عشان توصل للألعاب اللي تبيها بأسرع وقت!

تصميم مرن يدعم الأجهزة المحمولة

سابقاً كان الموقع يطلّع لك واجهة مختلفة اذا دخلت عن طريق الجوّالات أو الأجهزة اللوحية، لكن الآن بتصميم الموقع المرن بينعاد ترتيب نفس التصميم بحيث يكون مناسب لشاشة الجهاز اللي تتصفّح الموقع منه.

تطوير قسم التعليقات

نقاشاتنا في التعليقات بتصير أفضل بكثير من أول بوجود عدة تطويرات جديدة:

1. استخدام نظام جديد لتقييم التعليقات. النظام السابق قديم ووقفوا تطويره من فترة طويلة، وواجهنا معه بعض المشاكل. تقييمات التعليقات القديمة راحت للأسف بعد استخدام النظام الجديد.
2. بامكانك الآن تكتب رد على أي رد ثاني بكل سهولة، وبيظهر ردّك تحته، وبكذا تصير متابعة النقاش أسهل.
3. اعطاء ردود كاتب المقال تصميم مميّز عشان تقدر تتابعها بسهولة.
4. أول تعليق بيكون أحدث تعليق بدال أقدم تعليق لسببين: عشان تعرف وش آخر الآراء عن هالموضوع + نخفّف من سالفة “أول!”

وفيه تطويرات أكثر في الطريق للتعليقات ان شاءالله.

متابعة البث المباشر من الموقع

بتلاحظ فيه دائرة صغيرة حمرا على اليسار تمشي معك، هذي بتنوّر أخضر اذا بدينا البث المباشر بحيث تنتبه متى ما صار بث وانت تتصفّح الموقع. بالاضافة لذلك سوينا صفحة خاصة للبث في الموقع تسهّل عليك متابعة البث وتسهّل علينا كتابة أي معلومات متعلقة فيه في نفس الصفحة.

تطوير محرّك البحث

جرّب تبحث عن أي شي في الموقع، وبتكتشف ان مربّع البحث بيطلع لك نتائج مقترحه مصنّفه على عدّة تصنيفات بحيث يسهّل عليك تلقى الموضوع اللي تبيه بسرعه. اختار الموضوع اللي تبيه، أو اضغط “انتر” اذا تبي تشوف نتائج البحث التقليدية.

ملف شخصي رهيب للأعضاء والكتّاب

تقدر تشوف فيها نبذه عن العضو، والاقتباس اللي اختاره، وحساباته في أماكن كثير، وآخر تويتاته الشخصية، وآخر مواضيعه في حال كان كاتب. تقدر تسوي لك حساب عن طريق صفحة التسجيل وتعبّي بياناتك في ملفّك الشخصي بكل سهولة.

طريقة جديدة لعرض مواضيع الفيديو

مواضيع الفيديو الآن يتم نشرها بشكل مميّز يركّز على الفيديو والفيديوهات اللي لها علاقه فيها بدون ما يشتّتك بمعلومات ما تحتاجها.

ختاماً..

هذي نظرة سريعة على أبرز التطويرات اللي بتشوفها في التصميم الجديد في الموقع، لكن بتلاحظ تفاصيل كثيرة صغيرة جديدة نتمنى انها تعجبك.

حاب أنوّه ان هذي البداية فقط، هذا “الأساس” حق الموقع الجديد فقط. فيه بعض المشاكل البسيطة راح نحلها قريباً، وفيه تطويرات كثيرة جداً جايه بالطريق ان شاءالله، بالاضافة طبعاً للأشياء اللي تقترحونها علينا.

وأخيراً، حاب أشكر شخصين لولا الله ثم هم كان ماقدرنا ننجز هالخطوة المهمة:

• مصمّم ومطوّر الموقع أحمد غيلان يعطيه ألف عافية. إنسان جداً مبدع عنده حس تصميمي نادر تلقاه في مصمّم عربي، بالاضافة الى مهارات مميّزة في التطوير ماشاءالله عليه. استمتعت وتشرّفت بالعمل معه صراحة. ولو ترسل له شكر في تويتر اتوقع بتدعمه معنوياً لأن شغل الموقع الجديد ذبحه 😛
• مدير التحرير الرهيب محمد الشريف اللي مو بس يساهم في اثراء محتوى الموقع بشكل كبير، ساهم بعد في التطوير الجديد للموقع في انه رجع وعاد “تضبيط” جميع تقييمات الموقع (أكثر من 90 تقييم) عشان تتوافق مع التصميم الجديد. شغله مرهقة جداً، لكن كالعادة كان قدها وأنهاها في وقت قياسي.

وفي حال كان عندك أي ملاحظات أو اقتراحات على الموقع الجديد، فياليت تشاركنا فيها بالتعليقات.