شركة مايكروسوفت (Microsoft) مازالت تطمح للسيطرة على عالم الالعاب وبتنافس بكامل قوتها عشان تحقق هذا الشي و ناوية تقدم العاب قوية جدا لهذا العام. أعلنت الشركة انها راح تستضيف 16 شركة مختلفة عشان تطور لهم العابهم خلال مؤتمر GDC، والشي القوي جدا اللي راح يسووه ان هذي الالعاب اللي ناوين يطوروها يبغوها تشتغل على البي سي -ويندوز 10 (Windows 10) بالتحديد- والاكس بوكس ون مع بعض يعني كروس بلاي (Cross-play) بين الجهازين.
خلال هذي الاجتماعات راح تناقش مايكروسوفت مع المطورين اشياء كثيرة، من اهمها انهم راح يتناقشوا عن برنامجهم الجديد اللي اسمه دايركت اكس 12 (DirectX 12)، وزي ماذكرت فوق راح يتناقشوا عن تشغيل الالعاب على جهازي البي سي والاكس بوكس ون مع بعض عن طريق برنامج الاكس بوكس لايف (Xbox Live).
فيل سبنسر (Phill Spencer) رئيس قسم الاكس بوكس، في معرض جي دي سي 2015، راح يقدم عرض تقديمي للالعاب المستقبلية اللي راح تدعم الاكس بوكس و البي سي واللي سموها بيئة أنظمة مايكروسوفت، وهي بيئة تضم جميع منصات مايكروسوفت (Ecosystems) في يوم 4 من شهر مارس الساعة 7 مساء بتوقيت بريطانيا. طبعا حنا مانقدر نحضر هذا العرض، لكن العرض راح ينزل على اليوتيوب و الاكس بوكس لايف و الاكس بوكس واير و قناة اجنبية -Channel 9- مالنا بيها بعد ماينتهي التقديم ولكن بنفس اليوم.
اذا فاتك كل ذا برضه لا تزعل لان كل هذي الالعاب راح تقدر تشوفها وتجربها بنفسك في معرض جي دي سي (GDC) لعام 2015، مايكروسوفت تقول: “راح نقدم اجدد و اعظم الالعاب اللي حتنزل لكم خلال معرض جي دي سي” الالعاب راح تكون للاكس بوكس و لويندوز 10، كمان راح يعرضوا العاب المطور المستقل اللي بيطوروها خلال المعرض.
كلام كبير من مايكروسوفت واذا طبقوا هذي الفكرة راح يضيقوا الخناق على سوني بشكل كبير جداً، راح نشوف مع الايام هذي الالعاب الرهيبة اللي يتكلموا عنها ونعرف اذا هي فعلاً رهيبة ولا مجرد كلام.
واضح ان مايكروسوفت داخلين السنة هذي بقوة وجدية عالية، كتبنا قبل كذة عن الميزات الاجتماعية الجديدة للاكس بوكس، وكمان كتبنا كيف ان فيل سبنسر يبغى لاعبين الاكس بوكس يفتخروا بأن اكس بوكس تحت مظلة مايكروسوفت.
اش رايكم الخبر و بنظرة مايكروسوفت في تطوير الالعاب؟
