رغم ان مصادر شراء الالعاب تنوعت و تغيرت في السنوات الاخيرة، بحيث صار عندنا موقع امازون و متاجر الاجهزة الرسمية، الا ان كثير مننا – و انا منهم – ما زلت اعتمد على محلات الالعاب للشراء.
مشكلة المحلات هذي انها من ايام البلايستيشن 1 و يمكن قبل و هي ما تطورت، ولا تغيرت و مازالت مستمرة بدون سياسة واضحة في البيع و التوريد. اللي اقصده بكلامي ان المحلات هذي تبيع اللعبة بمجرد توفرها, سواء قبل او بعد الاصدار الرسمي من الشركة، و اذا سألت عن موعد صدور العاب معينة قالوا لك “ماندري” ! يعني انت و حظك في انك تلحق لعبة تبغاها قبل لا تخلص.
المحلات العالمية اليوم عندها سياسات و خدمات واضحة تفيد اللاعبين بشكل عام، مثل امكانية حجز لعبتك و اول ما تنزل على طول يمديك تستلمها، توفير النسخ الخاصة للالعاب اذا كنت من هواة التجميع, و ايضا عندها تاريخ واضح و معلوم عن يوم توفر اللعبة و حتى لو توفرت اللعبة قبل هالموعد غالبا ماراح يبدأ البيع قبل اليوم المحدد.
صحيح ان عدم توفر هذي الخدمات و غيرها يرجع الى الشركات انفسهم و دعمهم للمنطقة، لكن مع القوة الشرائية اليوم للاعبين صار لازم ان المحلات عندنا تتحرك و تطلب دعم رسمي و مباشر من شركات الالعاب. و فائدة الدعم هذا رح ترجع لنا كلاعبين و ايضا للمحلات انفسهم، و بيساهم في تخفيض عمليات “النصب” اللي دايم تصير مع بعض الالعاب مثل فيفا و كود و غيرهم..
على أي حال، استمرار الوضع زي كذا رح يخلي كثير من المحلات تخسر، و احنا كلاعبين ما يهمنا بالدرجة الاولى خسارتهم لان البديل متوفر و جاهز و كثير من اللاعبين صاروا يعتمدون على المتاجر الرسمية في الشراء (متجر البلايستيشن و الاكس بوكس).
بالنهاية, المحلات صار لازم تتحرك و تقدم خدماتها للاعبين قبل فوات الاوان و توجه الجميع للبديل اللي هو – حتى الان – افضل !
و انت عزيزي القارئ، هل مازلت تعتمد على المحلات في الشراء او صرت تستخدم المتاجر الرسمية؟
