محمد الشريف
في مقابلة جديدة مع هيديو كوجيما (Hideo Kojima)، تكلّم لأول مرة عن بعض الأخبار المهمة للجزء الخامس من سلسلة Metal Gear Solid. واللي ما يعرف كوجيما، كوجيما من النوع اللي يجلس فترة يسوّي مقابلات كثير ويظهر في مواقع كثير ولكن الأشياء المهمّة فعلياً قليلة، لكن في هالمقابلة تكّلم عن أشياء مهمّة.
أوّل المعلومات المهمة ان Meta Gear Solid V: The Phantom Pain ما راح تنزل في أي وقت قريب. كثير من الناس توقعوا انها راح تنزل في تاريخ قريب من Metal Gear Solid V: Ground Zeroes اللي تعتبر جزء من اللعبة، أو مثل ما وصفها كوجيما بأنه شي زي “المدخل” عشان تتعوّد على الانتقال الجديد والكبير للسلسلة على حد وصفه.
ثاني المعلومات المهمّة، كوجيما اعترف ان اطلاق فانتوم بين وجراوند زيروز مع بعض في لعبة وحدة بيكون أفضل. لكن بسبب عدم جاهزية فانتوم بين، فقرّر كوجيما انه يطلق جراوند زيروز أوّل ويخلّي اللاعبين يجربونها ويلعبون فيها الين ما تخلّص فانتوم بين واللي تعتبر أكبر بكثير من جراوند زيروز.
يقول كوجيما:” لو نشبّه الموضوع بفيلم من هوليوود، نقدر نقول ان جراوند زيروز مثل أول 10-15 دقيقة من الفيلم واللي تهدف الى جذب اهتمام المشاهدين”. بعدها ذكر كوجيما ان فيه حدث كبير في اللعبة بيصير، وهو حدث فاصل ما بين جراوند زيروز وفانتوم بين واللي الفرق الزمني بينهم تسع سنوات!
أخيراً، كوجيما ذكر ان كل اللعبتين، جراوند زيروز وفانتوم بين، لعبتين عالم مفتوح. الفرق بينهم ان جراوند زيروز عالمها أصغر، أما فانتوم بين فعالمها بيكون هائل على حد زعم كوجيما.
سلسلة ميتال جير سوليد لا شك انها تحتاج للتغيير، واللي لعب Peace Walker بيلاحظ ان اللعبة توجّهها مايل للعالم المفتوح من ناحية المهمات الجانبية وتطوير الأسلحة، برضو يكون عندك قاعدة تسوّي فيها تطويراتك وتنطلق منها مهماتك، تماماً مثل ألعاب العالم المفتوح، الا انها ما كانت عالم مفتوح فعلياً.
كعاشق للسلسلة، أعتقد ان التوجّه هذا صحيح ولو انه مقلق. تعوّدت من كوجيما اني أشوف تصميم مراحل دقيق جداً، وهذا الشي تقريباً مستحيل مع ألعاب العالم المفتوح. غير كذا، كوجيما سلك طريق المطوّرين في الوقت الحالي وهو تسهيل اللعبة، عشان توصل لأكبر عدد ممكن من اللاعبين. الشي هذا واضح في Reflex Mode واللي تعطي سنيك ميزة انه تلقائياً يصوّب على الجندي والوقت يصير يمشي بالبطيء، وبهذا الشكل صار اللاعب يقدر يتفادى الكشف بشكل أسهل.
وش رايك في المعلومات الجديدة لميتال جير سوليد 5؟ هل تتوقع ان التغييرات الكبيرة في السلسلة بتكون سبب في نجاحها، او فشلها؟ شاركنا رأيك في التعليقات!
بارعة
أيمن اليغشي