محمد الشريف
عرض هيديو كوجيما (Hideo Kojima)، مخترع سلسلة ميتال جير سوليد المعروفة، ديمو كامل وواضح عن طريقة اللعب في الجزء الأخير من السلسلة. تم العرض في معرض طوكيو للألعاب المعروف، واللي صار قبل كم يوم.
اللي ما شاف الديمو، هذا تقريباً أفضل فيديو يعرض لك كل شي موجود في اللعبة من مميزات وتغييرات. فيه ديموز كثيرة وبعضها في الليل، لكنها ما هي واضحة بمثل وضوح هذا الفيديو:
واضح من بداية الفيديو ان اللعبة فيها تغييرات جذرية سواءً في طريقة اللعب، وحتى في القصة. لا تنسون ان كوجيما قال في مقابلة ان هذا الجزء يعتبر “نقطة تحوّل في السلسلة” وانه من كثر التغييرات اللي سواها في السلسلة، صار مهتم جداً بأنه يعرف آراء اللاعبين عنها.
هذي التغييرات اللي لاحظتها في الديمو:
- تقدر تحط علامات (tags) على الأعداء وتصير تشوف أماكنهم حتى لو كنت بعيد. يذكرنا هذا الشي بسلسلة Splinter Cell.
- سنيك ياخذ وضعية الاحتماء بشكل احتياطي، ما يحتاج تضغط مثلث عشان يحتمي.
- المواجهات القتالية اليدوّية CQC تغيّرت، سنيك صار يتضارب بشكل شرس وواقعي أكثر.
- الخريطة تفتحها وتستخدمها بدون ما توقف اللعبة. الجهاز اللي معه تابليت اسمه iDroid.
- شالوا نظام انتباه الأعداه لوجودك (Alert Mode). ما عاد فيه عداد في نص الشاشة مكتوب فيه مدى درجة انتباه الأعداء لوجودك.
- شالوا الكشف المفاجئ للأعداء لك. من زمان اذا شافوك الأعداء ينطلق الانذار ويخرشونك على طول، الحين صاروا يعطونك ثواني تصير الحركة فيها بطيئة عشان تستغلها وتخدّر العدو تحت اسم ميزة جديدة اللي Bullet Time.
- سنيك ما يشيل معه الا سلاحين فقط. هذا الشي موجود في جزء Peace Walker ولكن كثيرين ما لعبوه.
- اذا خلصت المهمّة بامكانك تستدعي هليكوبتر تجي وتاخذك وتنهي المهمّة.
- سنيك يسوق سيّارة!
- بامكانك تسوّي سلسلة من الضربات المتتالية لأكثر من عدو. تمسك أول واحد وتبطحه في الأرض وبعدها تمسك اللي بعده بشكل تسلسل وهكذا. موجودة في Peace Walker برضو.
- شالوا المستطيل حق الطاقة واستبدلوه بتغيير لون الشاشة اذا جاتك ضربات.
برضو من الأشياء اللي المفروض نعرفها:
- المهمة عبارة عن مهمّة عشوائية تم تكوينها ولا لها علاقة بالقصة. لاحظ اسم المهمة Tokyo Game Show Mission.
- لا زال العمل مستمر على الذكاء الاصطناعي، تقدر تلاحظ الضعف في سلوك الأعداء. الديمو هذا بصعوبة Easy mode.
أخيراً، من التغييرات اللي تستحق الذكر الى الآن هي التخلّي عن David Hayter الممثل الصوتي الأوّل للسلسلة بعد أكثر من 15 سنة من العمل بدور الشخصية الرئيسية Snake، وبرضو تغيير السلسلة من لعبة مغامرات محدودة الى لعبة عالم مفتوح بالكامل – الميزة اللي دائماً كوجيما يذكرها في كل مقابلة.
وش رايكم بالديمو؟ هل التغييرات الكبيرة في السلسلة بتكون في صالحها؟ شاركونا برأيكم في التعليقات!
بارعة
أيمن اليغشي
