تكلم كين ليفين، مخترع سلسلة بيوشوك، عن لعبة بيوشوك اللي أعلنوها على بلاي ستيشن فيتا في عام 2011 واللي ما نزلت الى الآن، ولا أحد يدري وش صار عليها.
يقول كين على تويتر: “سوني و2K (ناشر بيوشوك) ما قدروا يتوصلون الى اتفاقية في آخر مرة شيكت على الموضوع. كانوا متفائلين بهالموضوع أكثر في عام 2011”.
يقول كين برضو في تويت ثاني: “يا ليت أقدر أسويها لحالي، لكن المحامين وهالأشياء (يقصد الاجراءات). لا زلت أحب الفيتا”.
سأله واحد من المتابعين عن خطته اللي كان حاطها لبيوشوك على الفيتا، وقال: “كنت أفكر بشي شبيه بلعبة Final Fantasy Tactics تقع أحداثه قبل سقوط بلدة رابتشر (البلدة اللي تصير فيها أحداث الجزء الأول). شي يشتغل بشكل صحيح ومناسب للفيتا، بالاضافة الى ان نظام القتال بيكون طقني وأطقك”.
واضح ان كين ليفين كان يبغى يسوي مشروع كبير على الفيتا، لكن للأسف “الكبار” ما قدروا يتفقون على شي يرضي الطرفين. هذا كله ما يعني ان اللعبة تكنسلت، يمكن يتفقون في أي لحظة. لكن الى كتابة هذي الكلمات، المشروع يبدو انه تعقد.
هل كنت تبغى بيوشوك على الفيتا؟
