أعلن المطوّر Ninja Theory عن نسخة البي سي للعبتهم الجايه هيل بليد، مع بعض الاضافات اللي ممكن تخليك تشتري اللعبة على البي سي.
تفاصيل نسخة البي سي تم الاعلان عنها، ينوي المطوّر انه يخلّي لعبته تدعم دقة وضوح 4K (دقة عالية جدًا ما تلقاها في ألعاب الأجهزة المنزلية)، بالاضافة الى PC mods أو امكانية اطلاق نسخ معدلة على اللعبة، واللي يسوونها اللاعبين نفسهم.
يقول واحد من المطوّرين: “أعتقد ان البي سي يسمح لنا بحريّة أكثر من باقي منصات الألعاب، نبي نوصل لمستوى نقدر نخلّي اللاعبين اللي يلعبون اللعبة يضيفون أشياء من عندهم ويسوون أشياء غير متوقعة. يضيفون أشياء أو أفكار تعطي اللعبة محتوى أكبر”.
الملفت للنظر ان اللعبة أول ما أعلنوا عنها كانوا يقولون انها “حصرية بشكل مؤقت لبلايستيشن 4” وانهم في ذاك الوقت يشتغلون على نسخة البي اس 4 فقط، لكن الآن أعلنوا عن نسخة البي سي حتى قبل نزول اللعبة على بلايستيشن 4.
بالنسبة للعبة نفسها، المطوّر يعرف ان كثير من اللاعبين يشبهّون اللعبة هذي بلعبة Heavenly Sword واللي اشتغل عليها نفس الاستديو، وكانت حصرية لبلايستيشن 3. بعض اللاعبين كان يقول عليها ان لعبة هيل بليد هي جزء غير مباشر للعبة هيفنلي سورد، لكن يبدو ان المطوّر يختلف في هذا ويقول:
“لا تقولون انها جزء جديد غير مباشر للعبة هيفنلي سورد، لان لو قلنا هالكلام فاحتمال ان البعض بيتوقع ان القصة بتكون مرتبطة مع هيفنلي سورد، أو بيكون فيه تشابه من ناحية طريقة اللعب أو تصميم اللعبة. هذي لعبة جديدة تماماً”.
وش رأيك باعلانهم عن نسخة البي سي، ووش توقعاتك للعبة؟
