ملخص أحداث مؤتمر EA في E3 2013

انتهى قبل ساعات مؤتمر EA، اللي عرضوا فيه الكثير والكثير من الألعاب في أكبر حدث للألعاب في العالم، حدث E3.

ومثل ما وعدناكم على تويتر، هذا ملخّص المؤتمر بالكامل!

وعشان نريّحكم أكثر، قسمنا المؤتمر الى قسمين، قسم خاص بألعاب EA الرياضيّة، وقسم ثاني عن باقي ألعاب EA. شفتوا كيف حنّا نحبكم ونجيب لكم كل شي مرتّب ويفتح النفس؟

ملاحظة: جميع الألعاب المذكورة بتنزل على أجهزة الجيل القادم الا اذا ذكرنا عكس ذلك

ألعاب EA المنوّعة

بدأت EA مؤتمرها بعرض لطيف وظريف للعبة Plants vs. Zombies: Garden Warfare واللي بيكون مختلف عن الأجزاء اللي قبل، في هذا الجزء راح تختار نبات تلعب وتتحكم فيه! طريقة اللعب تبدو جديدة كلياً على السلسلة وشكلها ممتع. من أهم الأشياء اللي تخص اللعبة انها بتكون لعبة تعاونية، بمعنى انك تلعبها مع أخوياك. طبعاً كل شخصية لها قدرات وطريقة لعب خاصة، مثلاً فيه نباتات تطلق طلقات زي الرشاش، ونباتات ثانية تطلق زي القناص. أعتقد طبيعي اننا نتوقع فروقات زيادة مثل: بعض النباتات أسرع من الباقيات في الحركة، أو بعض النباتات تتحمل ضربات أكثر، وهكذا. اللعبة بتكون حصرية على Xbox360 و Xbox One.

بعدها شفنا عرض جديد للعبة TITANFALL من Respawn Entertainment واللي ذكروا فيها انهم بيركزون تركيز كبير على الأونلاين والأطوار التنافسية. اللعبة شكلها ممتاز جداً.

تكلمت EA بعد كذا عن استعدادها للجيل القادم وانها كوّنت محركين خاصين للجيل القادم وهم Ignite وFrostbite 3. وبشكل غير متوقع، كشفت EA عن أول عرض للعبة اللي ينتظرونها الكثير Star Wars: Battlefront.

شفنا بعد كذا عرض للعبة Need for Speed: Rivals، واللي قالوا لنا انها بتركز تركيز كبير على الأونلاين والخصائص التعاونية والاجتماعية. عرضوا ميزة جديدة وهي عبارة عن امكانية استدعاء هليكوبتر عن طريق التابليت! غريبة الميزة لكنها احتمال تضيف متعة للتجربة.

كشفت EA بعدها عن لعبة Dragon Age: Inquisition، واللي أشارت عنها بأنها “لعبة الآر بي جي المثالية للجيل القادم”. كلام كبير! نترككم مع العرض

ألعاب EA الرياضيّة

بدأ بعرض للعبة NBA Live 14 اللي لها شعبية كبيرة في أمريكا، وجابوا لاعب معروف في الرياضة هذي اسمه Kyrie Irving وتكلم عن اللعبة وقال انها واقعية وغيرها من الكلام التسويقي. من ميزات اللعبة انها بيتم تحديثها بعد كل مباراة بساعة وحدة فقط! وهذي ميزة أوّل مرة تصير حسب كلام EA.

عرضوا بعدها Madden NFL 25، واللي بيكون فيها ذكاء اصطناعي عالي، وان اللاعبين بامكانهم يتحكمون بشكل أفضل، وغيرها من الميزات اللي زي كذا.

عرضوا بعدها FIFA 14 واللي قالوا فيها ان الملاعب بتكون “واقعية أكثر”، وجابوا ملعب الكامب نو المعروف كمثال. تكلموا برضو عن الذكاء الاصطناعي المتقدم للعبة، وانها بتنزل هذا الخريف.

عرضوا بعدها الجزء الجديد للعبة NFL واللي أعلنوا فيها عن نظام جديد كلياً يمكّنك من رؤية ردة فعل لكل ضربة وانك تحس فيها. وهذا شي ما قد صار قبل، حسب كلام EA.

وعرضوا برضو UFC الجديدة

قبل لا يخلص المؤتمر، عرضت EA لعبتهم Battlefield 4 وكشفوا عن نظام Levelution واللي بيرفع من واقعية الحرب في اللعبة. شفنا بعد كذا لعب أونلاين لوحدة عسكرية من خمس لاعبين يسوون مهمة. شفنا فيها حركات رهيبة مطاردات الهليكوبتر للوحدة وطريقة تهربهم منها. والملفت للنظر ان واحد من الموجودين على المسرح معه تابليت، قدر يرسل نداء لضربات جوية!