أحمد قربان
موقع لعبة بلودبورن (Bloodborne) الرسمي اعلن عن بعض التفاصيل المهمة في اللعبة.
جبنا لكم اهم التفاصيل الموجودة:
- اللعب التعاوني: تقدر تلعب انت و اثنين من اصحابك لقتل اي زعيم. لبدا اللعب التعاوني المستضيف راح يستخدم مادة (Item) عنده اسمها (Hunter Calling Bell) للاتصال باللاعبين الاخرين، والضيف (Guest) لازم يستخدم مادة اسمها (Resonant Bell) للدخول الى عالم لعبة المستضيف. الاجتماع بين اللاعبين راح ينتهي اذا مات اي لاعب، او اذا وصلت لمنطقة لازم تفرق بين اللاعبين وترجع كل لاعب لعالمه. اللعبة راح تبحث لك عن لاعبين تلقائيا اذا استخدمت هذي المواد لكن تقدر تحط رقم سري اذا ماتبغا احد غير صديقك يدخل معك. الرقم السري تقدر توصله ل8 حروف.
- طور لاعب ضد لاعب: هذا الطور شبيه بلعبة دارك سولز 2 ( Dark Souls 2) بحيث انك تقدر تغزو على عالم لاعب وتقتله. اوقات امكانية الغزو كثيرة لكن راح ينتهي الغزو اذا دخلت تقاتل زعيم او اللعبة رجعت كل لاعب لعالمه.
- امكانية كتابة تلميحات للاعبين: هذي الخاصية موجودة ايضا بلعبة دارك سولز. راح تقدر تكتب تلميحات ونصائح للاعبين. واللاعبين راح يشوفوا قبور اللاعبين اللي ماتوا في مناطق موتهم ويقدروا يشوفوا اعادة لطريقة موتهم. ايضا راح تشوف اشباح اللاعبين وهم يمشوا في نفس المناطق اللي تمشي فيها.
- مهمات باسم (Chalice Dungeon): هذي المهمات موجودة بشكل عادي وعشوائي وتقدر تلعبها اونلاين او اوفلاين. لكن المهمات العشوائية لازم تكون اونلاين لتلعبها. تقدر تشارك مهماتك هذي اونلاين واي اخد يقدر يدخلها
- التحديثات: اول يوم في اطلاق اللعبة راح يصدر تحديث يحسن اداء الاونلاين و اداء اللعبة واستخدامها بالاضافة لبعض الاشياء الاخرى.
- بلايستيشن بلس: لتتمكن من استخدام اللعب التعاوني ولاعب ضد لاعب لازم تكون مشترك بالبلايستيشن بلس. لكن ماراح تحتاجه لمهمات Chalice Dungeon ولتنزيل اخر تحديثات اللعبة
تفاصيل رهيبة للعبة المنتظرة. كان ودي انهم يسهلوا طريقة استخدام اللعب التعاوني اكثر لكن الشكوى لله. اذا مهتم اكثر عن اللعبة كتبنا خبر نوضح فيه عن عرض تشويقي جديد للعبة ممكن يحمسك اكثر.
اش رايكم بالتفاصيل؟
احمد خالد
