الكثير منا يشتكي من أسعار الألعاب المرتفعة. البعض بسبب هذي الأسعار يتجه للقرصنة أو التهكير.هذا التهكير هو المرض المستعصي عند المطورين إللي أحيانا يوصلهم للإفلاس الكامل لذلك كليوم نشوف طريقة جديدة منهم أو من الشركات الكبيرة مثل سوني ومايكروسوفت لمحاربة هذي الفئة من اللاعبين. موضوعنا هذا ما خصصناه عشان نلوم المهكرين فشخصياً أعترف إن الألعاب غالية نوعا ما ولكن موضوعنا بيتكلم عن السبب إللي يخلي هذي الألعاب غالية وكيف ممكن نحل هذي المشكلة.وطبعاً النقاش مفتوح للجميع للي يحب يعطي وجهة نظرة في هذي النقطة.
ليش الألعاب غالية؟
بإختصار الإجابة لأن تكلفة إنتاجها مرتفعة. عشان المطور ينتج لعبة يحتاج أحياناً لثلاث سنين ويوظف أكثر من مئة شخص للعبة (في رزيدنت إيفل السادس العدد أكبر بكثير). خلنا ناخذ الموضوع بلغة الرياضيات لو كان كل شخص من المئة شخص يعمل براتب شهري 10000 ريال فالنتيجة إن رواتب الموظفين في ثلاث سنين فقط 36 مليون ريال. أشياء اخرى تكلف في الإنتاج فمثلا لو كان مقر العمل مستأجر فهذا مبلغ إضافي وطبعاً مع تكاليف الكهرباء والأشياء الثانية فهذي أيضاً مبالغ إضافية تزيد من تكلفة الإنتاج. شي آخر وهو إن الألعاب حالياً بدأت تاخذ ممثلين كبار وبتكاليف عالية وهذا شفناه في لعبة بيوند (Beyond) اللي جابت ممثلين من هوليوود وطبعاً لا تتوقع إنهم بيشتغلوا بسعر زهيد.
شي آخر وللأسف (وجهة نظر شخصية) الألعاب صارت تتطلب مبالغ كبيرة للإعلانات لأنها صارت عنصر مهم لنجاح أي لعبة، هنا عندنا مثال جيد وهي لعبة باتلفيلد 3 (Battlefield3) إللي حسب كلام المطور إن الإعلانات فقط كلفتهم أكثر من مئة مليون دولار!. من كل هذا نستنتج المبالغ الكبيرة إللي تندفع في إنتاج لعبة.
طيب كيف الألعاب تجيب ربح؟
في مقولة منتشرة في مجتمعنا: “لا تشتري سمكة في البحر” تقال للشخص المتسرع بشكل عام أو إللي يشتري شي ما شافه بعينه وما يعرف إذا كان بيوصل له او لا. هذا هو حال المطورين يجلس على لعبة لسنوات طويلة على أمل إنها تبيع وتجيب ربح فيعني في النهاية الربح أبداً غير مضمون. هذا هو مصدر الربح الوحيد للمطور فلو إنتشرت القرصنة بشكل أوسع فهذا يعني مردود أقل للمطور وفي النهاية تقل ميزانيات تطوير الألعاب ويقل عددها وجودتها فالخاسر في النهاية عشاق الألعاب بشكل عام.
في الفترة الأخيرة نشوف أساليب (بعضها كريهة) متنوعة من المطورين عشان يجيب الربح المطلوب على سبيل المثال ينزل المحتويات الإضافية بشكل متتالي أو يحط لك مغريات عشان تدفع فلوس زيادة في اللعبة (MicroTransaction) في النهاية وبصراحة ما ندري هل المطور فعلاً يسوي هذا الشي عشان يغطي تكلفة الإنتاج أو بسبب الطمع الزائد.
نظرة شخصية
شخصياً أعتقد إن الألعاب فعلاً غالية بشكل بسيط وأتمنى إن أسعارها تنزل بشكل يخلي أكبر نسبة من الناس تقدر تلعبها. مع إني شخص موظف ولكن أحسب حسابي كل مرة أريد أشتري ألعاب. طبعاً تقدر تتوقع حال إللي ما زال يدرس. أعتقد إن القرصنة الالكترونية بشكل عام مأثرة كثير في المطورين ولكن الحل موجود وهو إن التخفيضات إللي نشوفها في ستيم المفروض تزيد ونشوف مثيل لها في أجهزة الكونسول.
أتوقع هذا بيحل المشكلة لكثير من اللاعبين (ما عدا الفئة إللي تحب تشتري الألعاب أول ما تنزل). لو سألتني من سبب هذي الأسعار المطور أو المهكرين ما أقدر أجاوبك بصراحة.
في النهاية نعم الألعاب غالية لكن لازم نخلي بالنا إن إنتاجها صعب ومكلف جداً والأهم إن ربحها غير مضمون وتعتبر مغامرة من مطور اللعبة. سؤالي لكل قارئ هل إنت من الناس إللي إتجهت للقرصنة بسبب أسعار الألعاب؟ وهل تحس إن الأسعار الحالية للألعاب مرتفعة ولازم تنزل؟ من سبب إرتفاعها؟ وإيش الحلول من وجهة نظرك لتخفيض هذي الأسعار؟ الموضوع للنقاش المفتوح عزيزي القارئ.
