محمد الشريف
قبل فترة أعلنت مايكروسوفت عن القرار اللي كان ينتظره كثير من اللاعبين، وهو الغاء بيع جهاز اكس بوكس مع جهاز كينيكت، وصار الواحد يقدر يشتري اكس بوكس ون بدون كينيكت وبسعر مرضي. هذا قرار بطولي من مايكروسوفت مافيه شك بالنسبة لي، لكن هل هذا يكفي؟
فقط مايكروسوفت وسوني عندهم الأرقام الحقيقية لمبيعات اجهزتهم، ولهم فترة ما أعلنوا عن المبيعات للأجهزة. لكن حسب آخر اعلان من الجهتين، بلاي ستيشن 4 متفوّق بفارق كبير عن اكس بوكس ون. الأرقام هذي كلها قبل اعلان مايكروسوفت عن بيع اكس بوكس ون بدون كينيكت، وشفنا الناس بدأت تفكر بشراء اكس بوكس ون بشكل أكبر من قبل.
هذا مؤشر جيّد لمايكروسوفت، خصوصاً وانها بدأت تعلن عن أشياء رهيبه قبل معرض E3، ومهّدت للمعرض بشكل ناجح وقدرت تلفت أنظار اللاعبين. مايكروسوفت عندها اعلانات في معرض E3 وهذا شي طبيعي جداً، لكن وش بيقدمون للاعبين؟ هل بتقدر تقنعهم ويبدأ اللاعب يفكّر بشراء اكس بوكس بعد ما شرا بلاي ستيشن 4 مثلاً؟
هذا كلّه يجيبنا لسؤال المقال الأساسي: وش اللي يحتاجه اكس بوكس ون عشان يلحق ببلاي ستيشن 4 أو يتجاوزه؟ ألعاب حصرية، تخفيض للجهاز نفسه بحيث يصير أرخص من بلاي ستيشن 4، ولا ايش؟ شاركونا آراءكم يارهيبين 🙂
احمد خالد
بارعة
Saudi Gamer
