كأنه بدري شوي على هالكلام ولا؟ يقول جوناثان مورين (Jonathan Morin) مخرج اللعبة ان الجزء الثاني من ووتش دوجز (Watch Dogs) ما بدأوا فيه للحين، لكن اذا صار فيه جزء ثاني في يوم من الأيام، فما راح ياخذ نفس الفترة اللي طوروا فيها الجزء الأول.
يقول مورين: “بكل تأكيد عملية تطوير الجزء الثاني ما راح تاخذ نفس وقت تطوير الجزء الأول في حال سويناه، لان جزء كبير قضيناه في تعريف هويّة اللعبة.”
سألوا مورين عن الشي اللي بيدفع يوبيسوفت انها تسوي جزء ثاني للوتش دوجز، لكنه تفادى هذا السؤال وقال: “أتوقع اننا في حالة جيدة، انا بكل تأكيد متحمس لفكرة اننا نتعمق في اللعبة ومفهوم “الاختراق” اللي فيها وسالفة انك تخترق مدينة كاملة وتصير تراقب فيها”.
أتوقع انه بدري جداً الكلام على الجزء الثاني، لان الجزء الأول ما نزل ولا لعبناه عشان يتكلمون في هالموضوع، خصوصاً بعد العروض الأخيرة واللي لاحظ فيها الكثير من اللاعبين هبوط مستوى اللعبة من ناحية الرسومات.
بتنزل ووتش دوجز في 27 من شهر مايو الجاي، على البي سي واكس بوكس 360 واكس بوكس ون وبلاي ستيشن 3 و4 بالاضافة الى نسخة خاصة بالويي يو بتنزل بعدين.
وش الأشياء اللي تنتظرها من لعبة ووتش دوجز هذي السنة؟
