ضبّطني وأضبّطك. يبدو ان هذا نظام بعض مطوّري الألعاب على ستيم في آخر فترة.
أطلقت ستيم خطاب تطلب فيه من مطوّري الألعاب اللي يبغون ينشرون ألعابهم على ستيم عن طريق خدمة Greenlight (خدمة تصويت للألعاب اللي ما نزلت، بحيث ياخذون الألعاب الأعلى تصويتاً ويطلقونها على ستيم قبل غيرها) انهم يوقفون استخدامها بشكل ملتف.
بعض المطورين يتفقون مع بعض مستخدمين ستيم، بحيث يوعدونهم انهم يعطونهم أكواد للعبة حقتهم اذا صوّتوا للعبتهم، وبكذا الطرفين يكسبون: المطوّر تنزل لعبته قبل غيره، واللي صوّت بيضمن انه ياخذ اللعبة ويلعبها في اللحظة اللي بتنزل فيها على ستيم.
ستيم أطلقت خطاب تناشد فيه المطوّرين انهم يوقفون هذي الحركة الاستغلالية:
” اذا كنت توعد الناس انك تعطيهم أكواد للعبتك مقابل انهم يصوتون لها انها تنزل عندنا، فلازم تعرف انك تحطنا في موقف محرج مره. هذا النوع من التصويت ما يعكس مدى اهتمام الناس الفعلي بلعبتك، وبكذا صارت مهمتنا أصعب في الوصول الى الألعاب اللي يبغونها الناس”.
” بالاضافة الى هذا، أنت اذا استخدمت هالطريقة بتخلّي باقي المطورين يبدأون يعتقدون ان هذي الطريقة الوحيدة لاطلاق ألعابهم على ستيم. ما نشوف ان هذا الشي بيكون في مصلحة نظام جرين لايت”.
يبدو ان ستيم تتعامل مع الموضوع بشكل لطيف الى الآن ولا اتخذوا عليه اجراءات حازمة، ولو انه بيضر نظامهم. وش رأيك أنت؟
