علقت يوبي سوفت على موضوع مشاكل لعبة Assasin’s Creed Unity وقالت إن مشكلة إختفاء وجوه الشخصيات في اللعبة ما كانت منتشرة وأنهم صلحوها في أول تحديث للعبة في يوم الإطلاق. قالت الشركة إن الامور تمام الحين وأن اللاعبين اللي مفعلين خاصية التحميل التلقائي لتحدياثت اللعبة ما راح تواجههم هالمشكلة أبد وإذا ما زلت تواجه هالمشكلة تواصل مع فريق الدعم الفني للشركة وبلغهم بالمشكلة.
علقت الشركة على مشكلة هبوط عدد إطارات اللعبة وهذه مشكلة منتشرة عند أغلب اللاعبين وتقريبا موجودة في جميع نسخ اللعبة من أجهزة بلايستيشن وإكسبوكس وقالت إن المشكلة هذه بالتحديد ما لها علاقة بكثرة الشخصيات المعروضة على الشاشة في نفس اللحظة وقالت:
“حنا إختبرنا ميزة إضافة شخصيات كثيرة في نفس المكان قبل إطلاق اللعبة بشكل مكثف وما زلنا نتابع الموضوع. جربنا كذا إختبار على موضوع زحمة الشخصيات واكتشفنا أنها ما لها علاقة بمشكلة هبوط الإطارات وعشان كذا بنستبعد كثرة الشخصية المعروضة في الشاشة كمسبب لهذه المشكلة. حاليا ما نقدر نقول لكم وش سبب المشكلة لأن الموضوع ياخذ وقت ويبيله إهتمام كبير من طرفنا. حاليا عندنا كذا طريقة لإصلاح المشكلة وقاعدين نختبرها وبنعلمكم وش يصير معنا حول سير عملية التصليح وكيف الأمور ماشية ومتى يمدينا ننزل هذه التصليحات في أقرب فرصة ممكنة خلال الاسابيع الجاية.
للأسف إنتشرت مشكلة أن الألعاب تنزل مفقعة وناقصة وغير مجربة من المطورين اليوم عندنا أساسن كريد وقبلها واتش دوقز وبعدها فار كراي وبعدين جا الدور على ليتل بيق بلانت 3. للأسف وجود الإنترنت في أجهزة الألعاب من الجيل الماضي كون كسل عند المطورين لأنه أعطاهم فرصة يصلحون مشاكل ألعابهم حتى بعد نزولها. وش رأيكم أعزائي بهذه المشاكل المنتشرة عند أغلب الألعاب هذه الفترة اللي تكون شبه جاهزة وقت الإطلاق. هل السبب هو تقاعس المطور أو أن الألعاب صار تطويرها صعب ولابد من وجود هذه المشاكل؟ شاركونا أرائكم في التعليقات.
