اسأل أي واحد من اللاعبين حولك: ايش بتشتري قبل، بلاي ستيشن فور ولا اكس بوكس ون؟ غالب الظن انه راح يقولك بلاي ستيشن فور.
مايكروسوفت تخبّطت كثير في كل منتجاتها في السنوات الأخيرة، والاكس بوكس ون من أفضل الأمثلة لها. تسويقها للاكس بوكس عليه ملاحظات كثيرة مرة، اعلان مايكروسوفت عن خطتها لمنع تشغيل الألعاب المستخدمة واستستلامها بعدها بفترة أفضل مثال لأغلاطها مع الجهاز.
الحق اني من الناس اللي حاطّه عينها على البلاي ستيشن فور، ودائماً أردّد في نفسي: “لازم أكون من أوّل الناس اللي يشترون البلاي ستيشن فور اذا نزل!”، ولكن من بعد مؤتمر مايكروسوفت في حدث E3 الأخير والألعاب الضخمة اللي أعلنوها خلتني أعيد التفكير أكثر من مرة.
فكرة المقال، طرت على بالي من جلستي أمس مع أحمد الراشد. كننا نتناقش خبره اللي كتبه لنا في مجتمعنا على جوجل بلس عن تحديد موعد اطلاق Titanfall، من أكثر الألعاب اللي متحمّس لها، ما عندي شك انها من أكثر الأألعاب اللي أتطلّع لها السنة الجاية ولو انها مجرّد لعبة أونلاين فقط.
EA أعلنت عن موعد الاطلاق، بالاضافة الى دعاية تعرّف باللعبة. اللي ما قد شافها، يقدر يتفرج على الفيديو:
طلعت لنا Respawn Entertainment بخلطة سحرية جديدة، وهي عبارة عن خلط طريقة لعب كول أوف دوتي السريعة والحماسية، في عالم خيال علمي شبيه بعالم Halo.
جربت اللعبة في GamesCom السنة هذي، واخترتها في حلقة البودكاست الخاصة بجيمزكوم كأكثر لعبة أعجبتني في المعرض كله.
ما أتوقع ان العائق بالنسبة لي بيكون في اللعبة، لكن بكل تأكيد العائق الأول والأخير هو الجهاز نفسه. مايكروسوفت أعلنت عن نزول الجهاز في دول قليلة، وقضية اني أشتري الجهاز من أمازون فيها مخاطرة. أضف الى هذا كله ان دعم مايكروسوفت للمنطقة العربية في الاكس بوكس ضعيف جداً، وبعض الأحيان تحس انه ماهو موجود أصلاً.
أخيراً، أتمنى اننا نشوف دعم أكبر من مايكروسوفت للمنطقة العربية، شفنا بعض بوادر الأمل في نهاية الاكس بوكس 360 ولكنها برضو ما تكفي. نبغى نشوف مايكروسوفت تعطي اللاعبين مثل ما تعطي سوني!
وش رايك أنت في موضوع الاكس بوكس ون هذا كله؟ وهل بتشتري اكس بوكس ون على الرغم من كل هالعوائق؟ شاركنا برأيك في التعليقات!
