جوناثان بلو (Jonathan Blow) مطور لعبة ذا ويتنيس (The Witness) يقول انك راح تحتاج اقل شي 6 ساعات عشان تخلص كل الالغاز اللي بلعبة ذا ويتنيس. بلو قال ان امس جلس يلعب اللعبة باسرع اسلوب ممكن و قدر يخلص اللعبة في اكثر من 6 ساعات بشوي. بلو يقول ان لعبة ذا ويتنيس اكبر ب10 مرات من اخر لعبة الغاز هو صممها واللي اسمها برايد (Braid)، وايضا وضح بلو ان مع الوقت ممكن لعبة ذا ويتنيس تتطور اكثر وتصير اكبر واكبر.
قبل شهر بلو قال ان لعبة ذا ويتنيس راح يكون فيها 677 لغز. قال بلو: “كل الالغاز اللي سويناها في اللعبة راح تشوفها في اللعبة لما يتم شحنها وماراح نحذف اي لغز.” بلو ايضا قال لاحد المواقع ان كل الفلوس اللي جاته من لعبة برايد تم صرفها في تطوير لعبة ذا ويتنيس، و وضح انه راح يضطر يستلف فلوس زيادة عشان ينهي مشروع اللعبة.
لعبة ذا ويتنيس لسه مو كاملة و بلو ما أعطى موعد محدد لإصدار اللعبة لكن كلامه مثير للاهتمام لان من اسلوب كلامه كأنه يوضح ان اللعبة قريبة من الاكتمال و ان اللعبة راح تكون جاهزة في وقت قريب. بلو كتب تغريدات في حسابه على تويتر و قال ان لعبة ذا ويتنيس اخذت منه 380 دقيقة عشان يخلصها 100%، ولعبته السابقة برايد كانت تحتاج 38 دقيقة فقط عشان هو يقدر يكملها 100%.
لعبة ذا ويتنيس تم تطويرها في عام 2008 بعد النجاح الكبير اللي حققته لعبة برابد اللي هي اول لعبها طورها بلو، تاريخ اصدار ذا ويتنيس لسه مااتحدد لكنه راح يكون خلال هذي السنة واللعبة راح تصدر لاجهزة بلايستيشن 4 (Playstation 4)، ويندوز بي سي (PC)، و اجهزة الاي او اس (iOS)
اش رايكم باللعبة وهل متحمسين لها؟
