وش أكثر لعبة ندمت انك شريتها؟

كل لاعب عنده ذكريات بائسة مع بعض الألعاب، خصوصاً اللي يشتري لعبة متحمس لها بعد طول انتظار ويكتشف انها ماهي قد المستوى اللي تخيّله لها.

اليوم بيكون نقاشنا عن هذا الموضوع. أكثر لعبة ندمت انك شريتها. لعبة كنت باني عليها آمالك، لكن بعد شرائك لها اكتشفت انها مو بس أقل من اللي توقعته لها، لكنها خيبت ظنك بشكل كامل.

في 2008، جيل البلاي ستيشن 3 والاكس بوكس 360 كان لا زال في بداياته تقريباً. أغلب الألعاب كان مستواها في تخبط باستثناء بعض الألعاب مثل جيرز أوف وور. الكل وقتها كان ينتظر ألعاب من الطراز الكبير مثل Grand Theft Auto IV، KillZone 2، Metal Gear Solid 4، Final Fantasy XIII غيرها من الألعاب اللي اللاعبين بنوا عليها آمال هائلة.

الألعاب المذكورة في المثال هذا ممكن تختلف من شخص الى شخص، وأعتقد البعض بيختلف على الأمثلة، لكن حاول ترجع بالذاكرة شوي ورا، وانسى ان هذي الأمثلة نزلت وان الناس لعبتها وعرفت مستواها، وحاول تذكر العروض والدعايات وكلام الناس عنها. انسى ان الألعاب هذي نزلت واحتمال تتفق معي.

مرة ثانية، في 2008. الكل ينتظر لعبة من أضخم الألعاب في العالم، Grand Theft Auto IV. أول ظهور للسلسلة المعروفة في الجيل الجديد والكل يتفق على انها بتكون لعبة من الطراز الأسطوري. أظن اللي عاش وعاصر الفترة ذيك يذكر

نزلت اللعبة وبدأ كلام الناس عنها، برضه نزلت تقييمات اللعبة اللي كانت “استثنائية” ونادراً ما تلقى ألعاب توصل الى هذا المستوى من التقييمات. ما أظن شفت أحد ينتقد اللعبة، الكل كان يمدحها ويستمتع فيها.

لاعبين السعودية عندهم سبب اضافي يحمسهم على اللعبة، وهي ان اللعبة ممنوعة عندنا، وكل ممنوع مرغوب. تسربت اللعبة في الأسواق وتم بيعها بشكل حذر، طبيعي ان لعبة ممنوعة يرتفع سعرها في السوق. اللعبة صار وجودها زي المخدرات، بحيث يجيك واحد يقولك “تراني أعرف محل يبيع جراند ثيفت أوتو 4!”.

قدرت أشتري اللعبة من أحد المحلات بقيمة 300 ريال. سعر كان معقول للعبة بهذا الوضع، لعبة الكل يمدحها، ممنوعة بشدة لدرجة اني سمعت -ولا أدري عن صحة الكلام- ان المحل اذا انمسك بالجرم المشهود، بيتقفل المحل للأبد.

بدأت ألعب اللعبة بحماس غير طبيعي، انبهرت بمستوى الرسوم والمدينة الهائلة وكمية التفاصيل اللي فيها. كل شي في اللعبة شكله رائع. لكن مع الوقت بدأت ألاحظ بعض المشاكل المزعجة: التحكم بطيء وثقيل، سواءً وانت تتحكم بالشخصية نفسها أو وانت تسوق بالسيارة، الواقعية ممتازة لكن بدأت ألاحظ انها صارت تؤثر على تجربتي للعبة بشكل سلبي، اللعبة بشكل عام بدأت أحس انها مجرد “استعراض” لكن اذا لعبتها ما تحس انك تستمتع.

لا زلت أذكر وحدة من المهمات في بداية اللعبة، واللي المفروض ان البطل وقريبه يسكرون، وبعدها يطلبون منك انك تركب السيارة وترجع البيت. طريقة اللعبة في اقناع اللاعب ان الشخصية سكرانة كانت أسوأ شي على الاطلاق، الكاميرا تتحرك بشكل يجيب الصداع، الشخصية ما تتحرك بالشكل المطلوب. أقدر أشوف ان اللعبة تحاول “تقنعني” ان الشخصية سكرانة لذلك لازم نخليك تعيش هذا الجو، لكن الطرق اللي حاولوا يقنعوني فيها خلتني أكره اللعبة زيادة. أذكر من معاناتي في ذيك المهمة كنت أكلم اللعبة وأقول:” خلاص ياخي والله عرفنا انك سكران!”

مثل ماهو متعارف في الألعاب، ان أهم شي في اللعبة هو “طريقة اللعب”. ممكن البعض يقول ان القصة أو الرسوم تهمّه أكثر، أو غيره. لكن الحقيقة ان طريقة اللعب هي الأهم، ودليلي في هذا سؤال واحد: لو أعطيناك لعبة فيها أفضل قصة عرفها اللاعبين، وبرسوم تسحر العين، لكن شلنا كل شي من طريقة اللعب ولا خليناك تلعب خير شر. هل تقدر تكمّل اللعبة؟ لا طبعاً.

العكس صحيح، لو أعطيناك لعبة رسومها فاشلة، ولا فيها قصة ولا غيره، لكن أعطيناك طريقة لعب ممتازة. هل تقدر تلعب اللعبة؟ ايه، عندك أمثلة كثيرة لكن أقربها Minecraft. رسومات اللعبة عبارة عن مضلعات من العهد البدائي للألعاب، ولا فيها قصة، لكن طريقة اللعب فيها ادمانية.

بالنسبة لباقي معاناتي مع جراند ثيفت أوتو 4، حاولت أتحامل على نفسي وأقنعها ان اللعبة بتتحسن مع الوقت، وفعلاً بعد فترة بدأت أدخل أجواء اللعبة. لكن المشكلة ان في كل مرة تجيني مهمّة فيها قتال وطلق نار وغيره، ألاحظ ان اللعبة “بطيئة” وماني قادر أستمتع فيها اطلاقاً.

بعد حوالي 15 ساعة من المحاولات، اقتنعت تماماً ان جراند ثيفت أوتو 4 مخيّبة للآمال. تناقشت مع اللاعبين اللي أعرفهم وقتها وأكثرهم -بطبيعة الحال مع جراند ثيفت أوتو- استنكروا رأيي وقالوا ان اللعبة ممتازة بس يمكن ماهي موجّهة لي.

أخيراً، أعطيت اللعبة قريب لي توّه مشتري بلاي ستيشن 3، وأرسلنا الجهاز مع اللعبة الى بلدته، وللأسف ضاع الجهاز ومعه اللعبة للأبد. تم تعويض قريبي على الجهاز فقط، أما اللعبة رفضوا يدفعون تعويض لها لانها ما كانت مذكورة في الفاتورة، وكأنهم يبغوني أندم زيادة.

وش أكثر لعبة ندمت انك اشتريتها؟ شاركنا قصتك وخلتنا نستمتع بقراءتها!