حصل لي اليوم أجرّب لعبة Sunset Overdrive لأول مرة.
قد لعبت Chainsaw Lollipop؟ هذي تشبهها كثير، لكن جودتها أعلى بكثير. اللعبة من الطراز الآكشني البحت ومن العيار الثقيل، جوّها استهبال وأغاني صاخبة ولعب سريع ودمويّة في كل مكان.
الديمو اللي جربناه كان ديمو طور تعدد لاعبين. 8 لاعبين يلعبون في خريطة تجيهم أمواج من الوحوش وعندهم هدف واحد: دافع عن الهدف. أول ما بدأ اللعب الكل قام ينقّز يمين ويسار ويدوّر على الأماكن اللي نقدر نتزلج عليها، مثل ما شفنا في كل عرض للعبة.
اللعبة آكشنيه وسريعة مرة، وفيها دمويّة واضحة. طريقة الضرب بالأسلحة اليدوية فيها شي بسيط من inFAMOUS أو Prototype. لاحظت اني ما أستخدمها كثير وصرت أعتمد على الأسلحة أكثر، عكس انفيموس بالتمام.
التركيز واضح على الأسلحة الفتّاكة والخيالية، كل الأسلحة شكلها غريب ولا هو واقعي ولكنه له دوره، واذا عرفت تستخدمه فأنت راح تصير انسان فتّاك. الأعداء يطبون عليك من كل مكان وبأعداد كبيرة، وأنت تستلمهم بأسلحتك المخيفة وتقطعهم،
اللعبة ألوانها جميلة، طريقة رسمها الكرتوني وكثرة الألوان اللي فيها -خصوصاً الالوان الفاقعة- أعطاها طابع خاص.
كنت أتمنى اني أجرّب جزء من طور القصة، بما انه هو الاهم بالنسبة لي دائماً. لكن اللي شفته من طور تعدد اللاعبين كان رائع.
بتنزل اللعبة في 31-10-2014 حصرياً على اكس بوكس ون.
