تغيير إسم المستخدم على أجهزة بلايستيشن صار زي الحلم الجميل صعب المنال بالنسبة لكثير من ملاك أجهزة بلايستيشن خصوصا اللي شرو جهاز البلايستيشن3 بدري وكانوا من أوائل مستخدمي شبكة البلايستيشن وفي الغالب إستعجلوا في إختيار الاسم وحطو أي شيء بس عشان يبدأ يلعب ( مثلي أنا للأسف ) وبعد ما إنتشرت ألعاب الأونلاين وصار الكل عنده حساب رئيسي يلعب فيه توهقنا وإكتشفنا أن الإسم المخيس اللي أخترناه على عجالة يمثل هويتنا على هذه الشبكة والبعض مختار إسم خرابيط وصار يتمنى يغيره.
اليوم علق رئيس بلايستيشن أمريكا الأخ شون ليدن على الموضوع وقال أن الفكرة تطبيقها ياخذ وقت ويبيلها تفكير طويل وحنا نبي نعطي المستخدم حرية أكبر أثناء تجربتها على الشبكة وشرح سبب منعهم لخاصية تغيير إسم المستخدم ( PSN ID ) طول هالفترة على شبكتهم على مختلف أجهزتهم الثلاثة بدأ من البلايستيشن 3 وإنتهاء بالبلايستيشن 4 وقال:
“أن سبب المنع هو للحد من الإستخدام السيء لهذه الخاصية والإساءة لباقي مستخدمي الشبكة. فمثلا لو خلينا واحد يقدر يغير إسمه وصورته باستمرار وراح يلعب لعبة أونلاين زي كود وأساء وشتم مستخدمين ثانيين وقبل ما أحد يشتكي عليه ويرفع تقرير إساءة لنا يروح هذا الشخص ويغير إسمه وصورة حسابه ويروح يلعب لعبة ثانية ويكرر نفس الفعلة المشينة ويروح يغير إسمه وصورته مرة ثانية وتستمر المشاكل وهذا الشيء ما نبيه”.
عذر أقبح من ذنب كيف يمنعون خاصية زي هذه على كل المستخدمين عشان أقلية ممكن تسيء إستخدام هذه الخاصية. في حلول أذكى من كذا موجودة في شبكات ثانية. عندكم مثلا شبكة إكسبوكس لايف اللي ربطت تغيير الإسم بمبلغ رمزي عشان تمنع الناس من الإساءة لبعضهم. وعندك مثلا شبكة ستيم يمديك تغير إسمك متى ما تبي لكن إسمك مرتبط بعنوان ID ثابت ما يتغير في حال قليت أدبك يقفطونك عن طريق هذا العنوان.
وش رأيكم أعزائي بالسبب اللي قالته سوني هل فعلا تشوفونه مبرر مقنع لمنعهم لهذه الخاصية أو لا؟ شاركونا أرائكم في التعليقات.
