هل الأفضل لننتيندو انها تنزّل ألعابها على الأجهزة المنافسة؟

في مقابلة مع جيسون روبين (Jason Rubin)، رئيس شركة THQ اللي أفلست، وبرضو واحد من مؤسسي استديو نوتي دوق (Naughty Dog)، تكلم عن أوضاع ننتيندو الحالية المأساوية مع جهازها الويي يو (Wii U) في مقابلة تستاهل النقاش.

يقول جيسون:” في عالم الأجهزة المنزلية وطريقة عملها التجارية، ننتيندو أصبحت غير مناسبة كصانع للأجهزة”. استشهد روبين على وضع ننتيندو الحالي مع الويي يو اللي وضعه مأساوي، واللي من أطلقوه ننتيندو -من قبل حوالي سنة من الآن- ما باع الا 3.61 مليون وحدة حول العالم!

فيه موضوع ثاني مهم تكلم عنه روبين، وهو ان ننتيندو المفروض تنزّل ألعابها على باقي الأجهزة المنزلية، وانها ما تكون حصرية لننتيندو. يقول روبين:” ياخي هذي جريمة، سالفة انك ما تقدر تلعب هالألعاب على جهازك المنزلي اللي عندك -يقصد البلاي ستيشن والاكس بوكس- “.

كلام منطقي، لكن يحتاج للكثير من التعليق والنقاش. دائماً أتمنى اني ألعب زيلدا وماريو على البلاي ستيشن، واني ما أضطر أشغل جهاز كامل وأشبكه على الكهربا بعد ما كان مرمي عندي لشهور -ويمكن سنوات- بس عشان ألعب كم لعبة. هذا كان الوضع مع الويي، ويبدو ان الويي يو يبغى يسلك نفس الطريق بالتمام.

فيه نقطة مهمّة بخصوص هذا الموضوع، وهو ان فيه شركات قبل كانت تصنع أجهزة منزلية، وبعدها اضطرّت تترك تصنيع الأجهزة وتكتفي بتصنيع الألعاب فقط. مثال هذا الكلام شركة أتاري (Atari) وسيجا (SEGA). النقطة هذي أسمعها كثير لمن أناقش الجيمرز عن ننتيندو، ولا قد شفت أحد مؤخراً ضد هذي النقطة الا عشّاق ننتيندو.

لكن فيه سؤال مهم جداً يجي مع هذي النقطة: هل أتاري وسيجا نجحوا بعد ما تركوا عالم تصنيع الألعاب واتجهوا لتطوير الألعاب ونشرها؟ لا. كل الشركتين صارت حتى أضعف من شركات الألعاب مثل EA وغيرهم. ما أقدر ألوم ننتيندو على عدم تركها لتصنيع الألعاب، اذا كانت تفكر بهذا الشكل.

فيه نقطة ثانية، وهي ان ننتيندو مبدعة جداً في الأجهزة المحمولة. هل تدري ان مبيعات العدس (3DS) تجاوزت مبيعات البلاي ستيشن 3 في اليابان من زمان؟ أعتقد ان كلها فترة بسيطة وراح تدخل ننتيندو التاريخ مرة ثانية بجهازها العدس.

أعتقد ان وجود ننتيندو في عالم صناعة الأجهزة المنزلية ضروري. لا ننسى انهم هم أول ناس طبقّوا التفاعل الحركي بجهازهم الويي ووسّعوا دائرة اللاعبين وصارت تشمل كبار السن وصغار السن والبنات وكل الناس، بعد ما كان عالم الألعاب حصري للاعبين فقط. هذا الشي لا زالت سوني ومايكروسوفت يركضون وراه ويحلمون انهم يحققون نصف نجاح ننتيندو في هذا المجال.

وش رايك أنت في كلام جيسون؟ هل تتفق معه ان ننتيندو صارت غير مناسبة في عالم صناعة الأجهزة المنزلية؟ شاركنا رأيك في التعليقات!