ابتداءاً من المراجعة اللي بتنزل اليوم ان شاءالله، راح تلاحظ بداية التطوير في مراجعاتنا. الموضوع هذا يشرح الفكرة من نظام المراجعات الجديد.
أول شي غيرناه هو كلمة “مراجعة”. بنبدأ من اليوم ان شاءالله نستخدم كلمة “تقييم” بدالها. صحيح ان “مراجعة” هي الترجمة الصحيحة لكلمة Review، لكن اكتشفنا اننا فعلياً ما نستخدم هالكلمة ابد في سواليفنا. كل ما جينا نطلب رأي احد من الفريق بلعبه معينه نقول له “وش تقييمك لهاللعبه؟”. بالاضافة الى ان كلمة “مراجعة” رسمية بزيادة، واذا كنت تتابعنا من فترة بتكتشف اننا بعيدين كل البعد عن الرسميات.
درجات تقييم جديدة
في السابق كانت درجات التقييم عندنا هي (بالترتيب): اسحب عليها – تنفع تصبيره – توسع الصدر – لا تفوتك. لكن بعد ما جربناها فترة وشفنا ردود فعل الناس عليها، اكتشفنا ثلاث مشاكل كبيرة في الدرجات اللي اخترناها:
- كنا نستخدم اسلوب النصيحه في التقييم (اسحب عليها، لا تفوتك)، وهو اللي اتضح لنا مع الوقت اسلوب غير مناسب. راح نكتفي بتقييم اللعبه فقط وقرار الشراء راجع لك.
- الفرق بين “تنفع تصبيرة” و “توسع الصدر” ماهو واضح.
- بما ان اغلب الالعاب اللي نلعبها هي العاب كبيرة وتكون عادة ممتازة، فكنا ننجبر نعطيها تقييم “لا تفوتك” وهو اعلى تقييم موجود. هالشي صعّب شوي مسألة تمييز الالعاب الاستثنائيه بجودتها.
اللي سويناه هو اننا رمينا الدرجات القديمة وبنبدأ نستخدم جديدة (بالترتيب): ابو كلب – تمشي الحال – ممتازة! – اسطورية.
الالعاب الرهيبه اللي كانت سابقاً تاخذ تقييم “لا تفوتكّ” بتكون “ممتازة!” في النظام الجديد. الالعاب الرائعه جداً ونحس انها استثنائية بتاخذ تقييم “اسطورية”. بكذا الدرجات تصير اسهل للفهم، واقوى درجة ما تصير سهله زي أول.
طيب ليش ما تستخدمون الارقام للتقييم؟
غالباً هذا اللي بيجي ببالك بعد ما تقرا هالشرح “طيب ياخي ليش ما تسوون زي باقي المواقع وتقيمون باستخدام الارقام؟”. مشكلة الارقام انها مالها اي معنى. تقييم 10 عندي ممكن تعني لي ان اللعبه مافيها اي عيب، بس عند جميل ممكن تعني ان اللعبه اجمالاً رائعه بغض النظر عن عيوبها. طبعاً غير 6 و 7.5 و 8 و 9.3 – ارقام ممكن تعني بالنسبة لي شي يختلف تماماً عن اي شخص ثاني.
وطبعاً ما ننسى مشكلة المقارنات الأزلية “ليش اللعبة الفلانيه اخذت 8.5 واللعبه هذيك اللي احسن منها اخذت 8.0 بس؟”. يبدون الناس يقارنون الارقام ويطنشون كل التقييم ما عاد يقرونه، ويضيع الوقت في محاولات شرح وتبرير وحوسه.
البساطة حلوة يا جماعة الخير، اهم شي تعرف اذا اللعبه كويسه والا لا.
وش بيصير في المراجعات القديمة؟
بتستمر موجودة، وخلال الايام القادمة ان شاءالله راح نحدّثها كلها بحيث تتواكب مع النظام الجديد، والدرجات النهائيه كلها بتتعدل بحيث تمشي مع فكرة الدرجات الجديدة.
نتمنى يعجبك هذا التغيير، وكالعاده، نتمنى ما تبخل علينا باقتراحاتك وملاحظاتك، لانها تفيدنا بشكل كبير في تطوير الموقع وتقديم الافضل لمتابعينه.
