الايجابيات
- فكرة جديدة ومميزة: تختار حيوان وتلعب فيه في طوكيو بعد ما انقرضوا البشر، وتحاول تعيش لأطول فترة ممكنة وتخلص مهام معيّنة مطلوبة منك، مع مواجهة تحديات كثيرة تصعّب عليك مهمة من تقلّبات جوية وحيوانات أقوى منك وجوع وغيرة.
- حيوانات كثيرة جداً تفكّها مع الوقت وتلعب فيها، وهالشي يضيف تنويع أكبر للعبة ويطوّل عمر اللعبة أكثر.
- المهام في طور البقاء (Survival) تتغير كل مره تلعب، فتحس التحدّي كل مره يكون بشكل مختلف.
- رتم سريع وحماسي للعبة يخليك تحاول تخلص عدد كبير من المهمات في وقت قصير.
- وجود عناصر البقاء (Survival) تخليك تحاول تهتم بحيوانك عشان ما يموت وهو سوي المهمات (جوع، تقلبات جوية، امراض…الخ)، ووجود عناصر RPG تسمح لك بتطوير قدرات الحيوان عن طريق ملابس أو أدوات معينة.
السلبيات
- بعض المهام في طور البقاء (Survival) للأسف غير ممتعة لأنها مالها اي معنى وتخليك تطفش بسرعة، زي لما يطلب منك تروح لمنطقة بعيدة لمجرد انك تروح لها، أو تتزاوج وتجيب عيال لمجرد انك تجيب عيال. عكس المهام اللي تطلب منك قتل عدد معين من الحيوانات او غيرها اللي يكون فيها حماس.
- مع انك تلعب في مدينة شبيهه بالغابة، الا ان الموسيقى تحسسك انك في مرقص، من نوعية “بوم تس بوم تس بوم تس بوم تس”. ما تعيّشك جو اللعبة.
- طور البقاء (Survival) يعتمد بشكل كبير على معرفتك للمهام ومتابعتها بشكل مستمر، ومع ذلك استعراض المهام بطيء لانه يتطلب منك تضغط ستارت ثم تختار قائمة المهام. المشكلة ان كل ما تضغط ستارت تضطر تنتظر ثانيه او ثانيتين لين تقدر تسوي شي.
- طور القصة نظامه غريب، عشان تفتح مرحلة لازم تروح تلعب طور البقاء وتجمع ثلاث كروت وهالشي يفك لك مرحلة جديدة. ما تقدر تتقدّم في القصه الا كذا!
- اذا اخترت تلعب بحيوان نباتي (زي الغزال مثلاً) فبتحتاج تعتمد بشكل أساسي على الهرب من الاعداء أو التخفّي عنهم، يعني تصير زلابه، واللعب فيهم غير ممتع أبداً للأسف وممكن ضربة وحدة من اي حيوان تجيب العيد فيك وترجع تعيد المرحلة من جديد.
- ما تقدر تفك حيوانات جديدة الا اذا لعبت بالحيوانات المتوفرة (تبدأ باثنين فقط من ضمن عشرات)، يعني بتضطر تلعب بحيوانات مخيسه ومملة واجد بس عشان توصل للحيوانات اللي تبيها زي الأسد مثلاً.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
لعبة رائعة بفكرة جديدة ومميزة بس تعاني من بعض العيوب العبيطة اللي تمنعها من انها تصير شي عظيم. بتبدا تحس بالتكرار بعد كم ساعه من اللعب وهالشي بيجبرك تلعبها على شكل جرعات، او ممكن صعوبتها تطفّشك بسرعه وتخليك تتركها بدري. بالمناسبة تتطلب فهم بسيط للانجليزي بسبب اعتمادها على فهم وتنفيذ المهام في فترة زمنية بسيطة نسبياً..
فيديو اللعبة
