وش سالفة اللعبة
هذي اللعبة تقدر تعتبرها اعادة اصدار للعبة Strider الكلاسيكية على جهاز NES. لعبة “مناقز” باسلوب لعب كلاسيكي (التصوير من جنب وفي مراحل ضخمة)، بطلها ننجا هدفه انه يقتل جميع الأشرار. حتى القصة بسيطة زي الالعاب القديمة.
معلومات اللعبة
الناشر: Capcom
المطور: Double Helix Games
تاريخ الإصدار: 2014/02/18
النوع: مناقز
التصنيف العمري: PEGI 12+
عمر اللعبة: 5 ساعات (تقريبي)
الأجهزة الخاصة باللعبة: Xbox One, Xbox 360, PS4 (جهاز التقييم), PS3, PC
تحتاج إنجليزي؟: ما تحتاج
الايجابيات
- وجود كل الحركات الرهيبة اللي تتوقعها من ننجا: السرعة، الانتقال السريع، رد الطلقات بالسيف، وكثير غيرها!
- رتم اللعب سريع جداً لدرجة انك تقدر تقاتل الاعداء عالماشي بدون ما توقّف.
- عالم ضخم وتصميم مراحل مفتوح يشجّعك على الاستكشاف والبحث عن كل الأشياء اللي ممكن تلقاها فيه.
- مراحل منوّعة بشكل كبير تختبر جميع مهاراتك في اللعب. حتى الاعداء منوّعين وبيجبرونك تنوّع في لعبك الى حد ما.
- امكانية الحصول على حركات وترقيات وألوان كثيرة لشخصيتك بتلقاها مبعثره في عالم اللعبة الضخم.
السلبيات
- فجأه تلقى نفسك في مدينة وفيه ناس لازم تقتلهم. ليش طيب؟ وش السالفة؟ عطوني لو قصة بسيطة؟ مافيه. اقتلهم وانت ساكت.
- جرافيكس يليق بجهاز بلايستيشن 2. يا رجل حتى الشخصيات ما تفتح فهمها او حتى تتغيّر ملامح وجهها وهي تتكلم. شي تعيس.
- عادة هالألعاب تغطيك أشياء تجمّعها من الاعداء أو في المرحلة (قروش، نقاط خبرة … أي شي تجمّعه لتطوير شخصيتك). بس هنا الشي الوحيد اللي تجمعه من الاعداء هو الطاقة بس. يعني مافيه أي حافز انك تقتلهم الا اذا حشروك وقالوا ترا مب فاتحين لك الباب لين تقتلهم.
- التمثيل الصوتي سيء جداً، لو تجمّع اخوياك وتطلب كل واحد منهم يمثّل صوت شخصية متأكد بيطلعون أحسن. والحوارات تحسها مكتوبه من واحد توه يتعلم انجليزي. اجل احد يقول “escape is not for you”؟ ايش هذا؟
- موسيقى أبو كلب. أبو كلللللب. أول مره أفكّر جدياً اشيل الموسيقى وانا ألعب لانها احياناً تقتل حماسك. أحس لو البطل يسمعها كان نسى نص الحركات القتالية من التشتيت.
- صعوبة تغيير الاسلحة خلال اللعب. الاسلحة تغيّرها باستخدم الأسهم، يعني لازم تشيل أصبعك من عصا التحكّم (وبالتالي توقّف تماماً) عشان تغيّر سلاحك في وسط القتال.
- مستوى الصعوبة في اللعبة غير متوازن نهائياً. أول ساعتين من اللعبة تحسّها سهله مره بعدين فجأه تقرّر اللعبة تغتصبك!
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
اذا كنت تعشق شخصيات الننجا وتحب الألعاب السريعة فغالباً راح تستمتع في Strider. كانت بتصير لعبة ممتازة جداً لو المطوّر بذل جهد اضافي بسيط في اصلاح أغلب العيوب (المزعجة جداً) الموجودة في اللعبة.
ألعاب مشابهة
- Castlevania: Symphony of the Night
فيديو اللعبة
