الايجابيات
- طور قصة ممتاز من جميع النواحي بدون أي استثناء. القصة، الموسيقى، طريقة اللعب، الجرافيكس كل شي في طور القصة ممتاز الى درجة غير معقولة. تقدر تعرف قد ايش المطورين مهتمين باللعبة من أول ساعة في اللعبة. بكل بساطة، ما قدرت ألقى عيب واضح في طور القصة.
- التنويع الهائل في المراحل والبيئات المستخدمة وتطبيقها بشكل ممتاز بحيث تساعد اللاعب على التغيير من طريقة لعبه في كل مرحلة. عندك مراحل جبلية واسعة بحيث يمديك تهاجم الأعداء من أماكن كثيرة جداً، الى مراحل أصغر ولكن فيها الكثير من المنافذ بحيث يمديك تتسلل على العدو من وراه.
- الذكاء الاصطناعي الخارق في اللعبة. شفنا ألعاب كثيرة تحاول ترفع مستوى الذكاء الاصطناعي ولكن للأسف جميع المحاوت محصورة في كون الأعداء ما يموتون بسرعة أو اسلحتهم قوية وغيرها من المحاولات المملة. في هيلو، تشوف الأعداء كلهم يتفادون القنابل اللي ترميها عليهم، اذا أوشك العدو على الموت يهجم عليك هجمة سريعة ويحاول يضربك ضربته القاضية، اذا نزلت من الآليات الفضائية ترجع تلقاهم أخذوها وقاموا يحاربونك فيها.
- التنويع في الأسلحة واجبار اللاعب على عدم الاعتماد على سلاح واحد. جميع ألعاب الشوترز اللي لعبتها يعطونك سلاح أساسي -غالباً رشاش- وتلقى طلقاته في كل مكان في المرحلة. في هيلو ٤، راح تلقى نفسك مضطر تاخذ أي سلاح قدامك وتستخدمه ضد الأعداء لان سلاحك الأساسي خلّص الرصاص اللي فيه. في طور القصة لاحظت اني استخدمت جميع أنواع أسلحة اللعبة وعرفتها قبل لا أدخل عالم الأونلاين الواسع لها.
- الأونلاين وما أدراك ما الأونلاين. هذي اللعبة بكل بساطة، جمعت كل أطوار الأونلاين اللي يحلم فيها اللاعب وأتقنتها كلها. تبغى تيم ديث ماتش بخرايط صغيرة لعبها سريع وسلس مثل كول أوف دوتي؟ العب Infinity Slayer. تبغى تيم ديث ماتش بخرايط كبيرة وعدد أكبر من اللاعبين؟ العب Big Team Infinity Slayer، احتلال قواعد؟ Dominion. عندك عشر أطوار أونلاين تلعبها وتستمتع فيها كلها. شخصياً أكثر طور أعجبني Flood وهو عبارة عن فريقين، الأول شخصين فقط ويلعبون على انهم وحوش معدية infected والفريق الثاني ثمانية أشخاص على شكل جنود طبيعيين، الوحوش تقتل الخصم بحيث تعديه ويصير مع فريقهم الين ما يبقى آخر لاعب، قتلة اللاعب هذا تعطي نقاط أكثر. باختصار، طور الأونلاين لو نزل لحاله بدون باقي اللعبة بأشتريه من كثر ماهو ممتع.
السلبيات
- الطور التعاوني مافيه شي جديد. بعد ما لعبت طور القصة وعشت التجربة الاستثنائية اللي فيه، والأونلاين اللي جمع كل شي يدوّر عنه أي لاعب شوتر، كنت أتوقع اني بأعيش نفس التجربة الخيالية في الطور التعاوني ولكن مالقيت فيه شي جديد.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
من النادر جداً انك تلقى لعبة تجمع كل عناصر اللعبة الممتازة وتضبطها الى هذا الحد. اللعبة جمعت بين طور قصة خيالي ياخذ معك حول ثمان ساعات وطور اونلاين تنافسي يعيش معك أطول فترة ممكنة بسبب الجمهور الهائل للسلسلة بالاضافة الى الدعم المتواصل من المطور، وأخيراً طور تعاوني فيه مهمات جيدة جداً ويتم تحديث المراحل بشكل أسبوعي.. فيه لاعب شوتر يطلب أكثر من كذا؟
ألعاب مشابهة
- Call of Duty (بس في جو خيال علمي)
فيديو اللعبة
