الايجابيات
- اللعب بعدد كبير من الشخصيات المميّزة بشكل رائع سواءاً بشكلها أو شخصيتها أو امكانياتها وقدراتها. ما تحس ان فيه شخصيتين يشبهون بعض. تميّز الشخصيات يخليك ترتبط فيها وتهتم لها.
- ساعات لعب طويلة جداً بتخليك تحلل كل ريال دفعته في هاللعبة. اول مره تلعب اللعبة بتجلس تقريباً 20 ساعة عشان تخلصها. وعندك مهام جانبيه تقدر تلعبها، ومهام اضافية تقدر تحمّلها، وأطوار صعوبة ثانيه تجربها. تحس انك مره فنان؟ جرب تلعب الطور اللي اذا ماتت عندك شخصيه ما ترجع ابد!
- اسلوب لعب جداً ممتع يركّز على التكتيك بالدرجة الأولى (قريبه فكرته من الشطرنج اذا ما تعرف هالنوع من الالعاب)، ويتميّز بعمق كبير بدون تعقيد، لأن اللعبة تقدّم لك افكارها بشكل رائع يسهّل عليك انك تستوعبه وتندمج فيه.
- تنويع متوازن في مراحل القصه يجدّد لك التحدّيات اللي تواجهها ويخليك تستمتع باللعبة الى نهايتها.
- موسيقى تصويرية مميّزة.
السلبيات
- القصّة فيها اجزاء رهيبة لكن اجمالاً كان مستواها متوسّط. وفيه حوارات كثيرة تحسّها أطول من اللازم.
- مع ان اللعبة تشرح لك أفكار كثيرة بشكل رائع، الا انه فيه اختصارات واشياء بالقوائم ما انشرحت ولا كانت واضحة في الواجهة، وما دريت عنها الا بعد ما قطعت شوط طويل من اللعبة، وانقهرت اني ما استفدت منها من بدري.
- الاسلحة لها عمر افتراضي وبعدها تخرب. المشكلة مو هنا، المشكلة انك ما تقدر تصلحها الا عن طريق عصا سحرية نادره، وهالشي خلاني اتجنب تطويرها والاستفادة منها بشكل أكبر لاني اعرف انها بتخرب في فترة قصيره وبخسر كل فلوسي اللي دفعتها في تطويرها.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
هذي وبكل جدارة من أفضل الالعاب اللي لعبتها في حياتي على جهاز محمول، علماً بانها أول لعبة ألعبها من هالنوع، وأول لعبة أجربها في سلسلة Fire Emblem. اللعبة تخليك تدمن عليها وتقضي ساعات طويلة جداً في لعبها. حط في بالك انها لعبة تتطلب انك تمخمخ وانت تلعب، فاذا كنت تدور على لعبة رتمها سريع فغالباً هذي ما تصلح لك. يمكن ما يعجبك فيديو اللعبة اذا كان هالنوع من الالعاب جديد عليك، بس اذا حولك جهاز 3DS فانصحك وبشدّة انك تعطيها فرصه وتنزّل النسخة التجريبية (الديمو)، لأنه ممكن يعرّفك على وحده من أفضل تجارب هذا الجيل!
ألعاب مشابهة
- Final Fantasy Tactics
- Disgaea
فيديو اللعبة
