الايجابيات
- تنويع ممتاز في اللعب في طور القصّة يخليك تلعبه بدون ما تحس بالملل أو التكرار من البداية للنهاية.
- طور الأونلاين منوّع بشكل كبير، خاصة بعد اضافة الأطوار الجديدة مثل Blitz (الرهيب بالمناسبة) والسكوادز و Extinction (يستبدل الزومبي).
- اضافة السكوادز (Squads أو الفريق) تضيف عمق ومتعة أكبر للأونلاين. عندك 10 جنود تقدر تعدّل في أشكالهم وأسلحتهم على كيفك (بعد ما تفكّهم)، ثم تقدر تلعب أونلاين أنت وجنودك ضد خويّك وجنوده. الحلو أن جنودك بيلعبون على نفس مستواك، يعني اذا صرت فنّان بيصيرون فنّانين مثلك. والأحلى انك تقدر تتحدّى جنود خويّك بدون ما يكون هو موجود أونلاين أصلاً! وبالمناسبة، تقدر تفك برستيج لكل جندي عندك بعد ما يجمّع نقاط خبرة كافية.
- خيارات كثيرة للتحكّم بمظهر الجندي (الوجه والملابس والاكسسوارات…الخ) بحيث تتميّز عن غيرك.
- عودة السترايك باكج (Strike Package) المستخدمة في Modern Warfare 3. أعجبني هالشي لأنّي أفضّل استخدم باكج الدعم (Support) بدال الكيلستريك (Killstreak)، لأنه يسمح أنه يكون فيه توازن أكبر في اللعب. يعني حتى لو تلعب ضد فريق فنّان مره مو معطيك فرصه تجمّع قتلات الكيلستريك تقدر تستفيد وقتها من ميزات باكج الدعم لأن القتلات حقّتك تتجمّع عندك حتى لو مت.
- طور المخلوقات الفضائية الجديد (Extinction – “اكستنكشن”) يعتبر تطوّر ايجابي لطور الزومبيز. مبني على نفس الأساسات تقريباً (تجمّع فلوس وتشتري أسلحة ودفاعات وتقتل عدد كبير من الاعداء)، مع اختلاف الاعداء هالمرة ووجود 4 كلاسات تساعد في التنويع في اللعب (هجومي ودفاعي ومهندس ومسعف). وحتى لو خلصت مراحل هذا الطور، بتقدر تعيدها مره ثانية بصعوبة أعلى باستخدام شيء اسمه “ريليك” (Relic – أو قطعة أثرية قديمة) تضيف تحدّي أكبر للعبة، وحدة منهم مثلاً تخلّي رصاصك أضعف ضد الأعداء.
- الجنود اللي معك في الأونلاين بيعطونك توجيهات بشكل تلقائي (بصوت الكمبيوتر) لأماكن الأعداء. يعني تقدر تكتم صوت كل اللي معك بالفريق وبنفس الوقت تستفيد من فريقك. أريح من انك تسمع مراهقين يزاعقون ويسبّون أمهات العالم.
السلبيات
- طور القصة مع أنه ممتع من ناحية اللعب، الا ان القصّة الجديدة سيئة جداً. تحس انك تتابع فلم رخيص من التسعينات. أغلب “المفاجئات” اللي بالقصّة تقدر تتنبّأ فيها قبل ما تصير، وبعضها يضحّك من كثر ما فكرته مستهلكه وقديمة. وما أعجبني استخدام نفس الحركات وأسلوب الأخراج المستهلك اللي نشوفه في كل جزء من السلسلة (اقتحام بالبطيء، هروب من مكان ينفجر…الخ).
- الجرافيكس ممتاز (بالذات على البلايستيشن 4)، لكن المؤثّرات المرئية والحركة (الأنميشن) ماهي في نفس المستوى.
- طوال فترة لعبي في الأونلاين ماشفت أحد يستفيد من ميزة تدمير البيئة اللي اعلنوا عنها. حتى يمكن ما تنتبه انها موجودة أصلاً.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
كثير كانوا يعتقدون ان هالجزء مجرد حلب لشعبية السلسلة الشهيرة، لكن شخصياً أشوف ان الاضافات الجديدة تميّزها بشكل ممتاز عن الجزء السابق. اذا كنت تحب أسلوب لعب سلسلة كول أوف دوتي في الأونلاين، فلا يفوتك هذا الجزء. أما اذا ما استمتعت نهائياً في الأونلاين في الاجزاء السابقة، فلا تتوقّع تلقى شي يغيّر رأيك هنا، لأنها بتكون في نظرك نفس اللعبة مهما أضافوا لها.
ألعاب مشابهة
- سلسلة Counter Strike
فيديو اللعبة
