الايجابيات
- باختصار، أفضل جرافيكس راح تشوفه على أجهزة الجيل الحالي. اللعبة تبهرك بتفاصيل ما تتخيّل انك كنت بتشوفها في يوم من الأيام على بلايستيشن 3!
- تمثيل جداً رائع ومتقن من الممثّلين في اللعبة يحسّسك انك تتابع مسلسل أو فلم.
- نظام أكثر سهولة وسلاسة للتفاعل مع الأشياء والقتال مع الأعداء، ويعتمد على عصا التحكّم اليمنى بدال الأزرار. ما زال الاعتماد على الأزرار موجود (اللي يسمونه QTE)، لكن استخدامها صار قليل جداً مقارنة بالسابق (مقارنة في Heavy Rain). في البدايه بتحس ان النظام الجديد غريب، بس بتتعود عليه بسرعة.
- طور تعاوني ظريف يخلّيك تتحكّم بالبنت، بينما خويّك (على نفس الجهاز) يتحكّم بالروح اللي معك، علماً بأنك ما تقدر تتحكّم في الاثنين في نفس الوقت. لكن حلو انهم خلو اللي معك يشارك بدال ما هو يتفرّج بس.
- عكس اللي كانوا متوقّعينه الناس، اللعبة مافيها أي تعرّي، مما يعني انك تقدر تلعبها بوجود ناس ثانيين بدون خوف. (بس فيها مشاهد تبويس وكذا زي الأفلام)
السلبيات
- رواية القصّة بشكل غريب ومشتّت، بحيث تعيش فصولها بشكل عشوائي. مثلاً أول فصل هو آخر فصل في القصة، بعدين تروح لواحد من الفصول اللي في النص، بعدين فصل بعده، بعدين فصل قبله…الخ. في البداية تحسّها فكرة رهيبة وجديدة، بس بعدين تبدأ تضيّع الأحداث وترتيبها في القصّة لأن الفصول كثيرة.
- القصّة جداً عادية وفيها أحداث غير منطقية أبداً، وفيه عدة أشياء مهمّة يتركها الكاتب بدون أي شرح أو محاولة اقناع! بالإضافة إلى ان بعض الأحداث كانت متوقّعة بشكل مضحك. ويزيد الطين بلّة أنه ما واجهتني أي صدمة (أو twist) في القصّة.
- أسلوب لعب مكرّر وممل وخالي من التحدّي (ما تخسر أبد)، خاصة اذا لعبت بالروح (آيدن) اللي بتجلس تسوّي فيه نفس الاربع أو خمس أشياء طوال القصة. وبعض مناطق اللعبة تجبرك تسوّي أشياء مملّة جداً ما تضيف شي للحدث اللي جالس يصير. اعتقد ضعف القصّة خلا عيوب اللعب تبان أكثر.
- تبعات قراراتي خلال اللعب ما كانت واضحة لي لدرجة اني بديت أشك هل قراراتي تأثر في سير القصّة ولا لا؟ أستثني من هالشي كم موقف ينعدّون على أصابع اليد الوحدة. واللي يساهم في عدم وضوح هالشي هو انك تلعب الفصول بشكل عشوائي، فتحس أنه مستحيل تسوّي شي في المستقبل يأثر على شي سويته في الماضي مثلاً!
- شخصيات ضعيفة أجمالاً وغير مميّزة، وراح تجد صعوبة في انك تهتم لها أو تتذكّرها. حتى البطلة اللي المفروض انهم مسلّطين عليها الضوء طول القصّة ما قدرت أهتم لها أو اتعاطف معها باستثناء موقف واحد في وسط القصة.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
كاتب ومخرج اللعبة ديفد كيج رفع المعيار لمستوى عالي جداً في Heavy Rain لدرجة أنه حتى هو نفسه ما قدر يوصل له في هاللعبة. بعد ما خلّصت اللعبة قفلتها بدون أي اهتمام باللي صار أو اعادة تفكير بقراراتي خلال اللعبة، وهذا آخر شي كنت أتوقع أنه بيصير في لعبة زي كذا. تجربتي كانت جداً عادية، ولولا الجرافيكس والتمثيل الرهيبين بشكل استثنائي في اللعبة، كان اعتبرتها مضيعة للوقت.
ألعاب مشابهة
- Heavy Rain
- The Walking Dead
فيديو اللعبة
