وش سالفة اللعبة
لعبة مغامرات تتركز حول التخفي والاغتيالات. تدور احداث هذا الجزء في عصر الثورة الفرنسية، و اللي يميز هذا الجزء عن باقي السلسلة هو انه حصري لأجهزة الجيل (بلايستيشن 4 واكس بوكس ون) الجديد و البي سي.
معلومات اللعبة
الناشر: Ubisoft
المطور: Ubisoft Montreal
تاريخ الإصدار: 11/13/2014
التصنيف العمري: PEGI 18+
عمر اللعبة: 15 ساعة (تقريبي)
الأجهزة الخاصة باللعبة: Xbox One, PS4 (جهاز التقييم), PC
تحتاج إنجليزي؟: نص ونص
الايجابيات
- أول لعبة أساسنز برسوم أجهزة الجيل الجديد! جمال الرسوم تشوفه في تفاصيل كثيرة زي انعكاس الضوء على الاراضي المبللة أو الزجاج الملون المزخرف في المعابد يتغير درجات لونه حسب الزاوية أو حتى التفاصيل في ملابس البطل، فعلا تحس انك تدلع عيونك.
- مدينة باريس كبيرة و حيوية! هنا تشعر فعلا بقوة اجهزة الجيل الجديد، لمن تتسلق برج و تشوف كل تفاصيل مباني فرنسا من بداية المدينة لنهايته، بالاضافة ان مباني كثيرة تقدر تدخلها و تختبي فيها فيعطيك شعور ان المباني حقيقية مب مجرد صندوق زينة فاضي.
- زحمة يا دنيا! نجح المطور انه يعطيك شعور الثورة الفرنسية و الانقلاب مع حشود المحتجين عند المباني الحكومية و خصوصا لو بدأوا ينشدون بصوت واحد، في منطقة المحتجين كانوا بالالاف و تشوفهم على مد البصر! ما عمري شفت هذا الكم الهائل من الناس في اي لعبة قبل! و لهم فائدة انك ممن تتخفى بينهم.
- مهمات ممتعة و ما حسيت بأي تكرار! افضل جزء يطبق فكرة مهمات الاغتيال فيعطيك حرية كاملة، و تسوي تجهيزات قبل المهمة مثل ترشي الشغالة تسيب الشباك مفتوح، تنقذ سجناء يساعدونك، او تحط سم في الاكل او تسد فتحة المدخنة و اشياء كثييير. أو ممكن تدرعم بدون اي تجهيز، انت و اسلوبك.
- تطوير التحكم و نظام الانحناء، الان بالتحكم تقدر تخلي الشخصية يجري على الارض بدون يسوي حركة التسلق العشوائي اللي كانت مزعجة، و اضافة الانحناء عشان تتخبى و تمشي بدون صوت يشجع انك تلعب باسلوب التخفي مع اضافات اخرى ممتازة.
- الطور التعاوني (Co-op) اللي تلعب مهمات محددة مع 4 اشخاص اونلاين، لو كنت مع اصحابك بتخطط معهم هجمات و مين يروح يمين و يسار و تحدد الاهداف مع التوقيت المناسب عشان ما تنكشفون و تحس بحماس و انت تنجز المهمات معهم. بس لو لعبت مع ناس ما تعرفهم بتصير لعبة درعمة عشوائية.
- نظام الاسلحة و الدروع الجديد، تقدر الان تغيير كل قطعة لحالها و تختار لونها و كل قطعة لها ميزات و احصائيات مختلفة فتسوي تركيبة حسب رغبتك مع عدد لا بأس به من الاختيارات. فراح تشوف تنويع كبير في اشكال الاساسنز اللي تقابلهم اونلاين.
السلبيات
- القصة سطحية و باردة و تحس ماله أي علاقة في السلسلة اصلا، ركزوا على علاقات غرامية شخصية و ما اعطوا قصة الثورة الفرنسية حقه و نادرا يجيبوا سيرة العالم الحقيقي و Abstergo.
- شخصية البطل “ارنو” ضعيفة و ما حسيت بأي اهتمام فيه لدرجة اني نسيت اسمه و انا اكتب هذا التقييم. حتى “كونر” من الجزء الثالث يعجبني اكثر من هذا!
- اجبروني على استخدام تطبيق اللعبة على الجوال اللي عن طريقه ترسل اساسنز يسوون مهمات عشان تقدر تفتح الصناديق اللي في اللعبة، شي يغث كل شوي اطلع الجوال و انا العب، أول كنت تقدر تسويها من داخل اللعبة و تطبيق الجوال كان اختياري.
- بعض المشاكل تقنية، ناس يمشون في الهوا، ناس يظهروا من الهواء فجأة، هبوط في عدد الاطارات “تقطيع الصورة” في بعض المناطق، صوت الخلفيات يختفي احيانا. مع ان المشاكل ما اثرت معي كثير بس اذكرها للامانة.
- نظام المشتريات داخل اللعبة (Microtransactions) اللي تقدر تشتري اشياء في اللعبة بفلوس صدقية، مع انك منت مجبور و تقدر تجيب الشي اللي تبيه بجهدك بالفلوس اللي داخل اللعبة، بس اسعار الاشياء الكويسة شبه تعجيزي انك تجيب حقها بعملة اللعبة.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
مع ان هذا الجزء يعتبر سقطة من ناحية القصة و أهمية الأحداث ومشاكلها التقنية، إلا ان عشاق اساسنز كريد راح يستمتعوا و يقدروا الاضافات الجديدة مع الرسوم الخلابة ويمخمخوا في مهمات الإغتيال المطورة ويحسون في الفرق مع قوة أجهزة الجيل الجديد. لكن في نفس الوقت اذا ما قد لعبت اي جزء اساسنز قبل كذه ما انصحك تبدأ بـUnity.
ألعاب مشابهة
- سلسلة Hitman
- Prince of Persia
فيديو اللعبة
