الايجابيات
- إختلاف الطابع العام لهذا الجزء اللي خف التركيز فيه على جانب الأساسنز (اللي أحس انهم لازم يغييرون شوي) و ركزوا على القراصنة و حياتهم و طريقة تفكيرهم و عالم البحّارين و كيف إنهم يحبون الكنوز و الثروات. لكن يظل جانب الأساسنز موجود في أسلوب اللعب و التخفي و علاقتهم بالقصة بشكل عام.
- التخلص من بطل الجزء الثالث Conner اللي كان شخصية كريهة جداً. اما البطل الجديد Edward Kenway شخصيته أرهب و يحسسك أنك تلعب بقرصان خصوصاً في طريقة تفكيره و إستغلاله للمواقف لأهدافه الشخصية. لكن يظل Ezio هو شخصيتي المفضلة في السلسلة الى الان.
- تغيير القصة من شيء معقد و جدي جداً اللي كان في الجزء الثالث إلى قصة أبسط ما تحس انك تضيع في الأحداث.
- تطبيق ميزات من لعبة Farcry 3 مثل إمكانية تحديد أماكن الأعداء بأسلوب الـEagle vision و يصير تقدر تشوف الأعداء حتى لو في حاجز بينكم، أو الحاجة لصيد الحيوانات المختلفة لصنع ملابس أو اكسسوارات جديدة.
- سفينتك في اللعبة يحببونك فيها و يصير ودك تطورها و تزيد قوتها و عدد المدافع اللي فيها و دروعها. و حتى تعدل في شكلها و ألوانها، يحسسونك انك مشتري سيارة جديدة وودك تدلعها و تلغمها و تركب لها جنوط.
- المعارك البحرية طوروها بشكل كبير، خصوصا أنواع السفن المختلفة، أحياناً تترصد سفن معينة لأنك تعرف ان فيها كنوز أو موارد معينة تحتاجها، و أحياناً تجيك السفن الحربية العملاقة اللي بتجيب فيك العيد و تضطر تهرب منها.
- مع أن الرسوم مب ذاك الزود إلا أن المناظر خلابة (خصوصاً وقت غروب الشمس أو إنعكاس القمر على البحر) و العالم نفسه كبير جداً بعدد من القارات و الكثير من الجزر الإستوائية المليئة بالكنوز و الأسرار راح تعجب اللي يحبون عنصر الإستكشاف في الألعاب.
- عناصر إجتماعية أونلاين، مثلا لو أنا اكتشفت محل حوت نادر يجي للناس في قائمة الأصدقاء تنبيه اني لقيت الحوت النادر و يطلع محله في الخريطة عندهم و أشياء غيرها.
السلبيات
- مشاكل تقنية عديدة، و لو انه افضل بكثير من مشاكل الجزء الثالث.
- القصة عادية، مب شينة بس أحياناً تنسى القصة وودك تتمشى في العالم و تسوي الأحداث و المهمات الجانبية.
- يخرجونك من جو اللعبة في أجزاء القصة اللي في العالم الحالي خارج الـAnimus، و يعطونك مهمات تغثك بس ودك تخلص منها بسرعة عشان ترجع لقصة Edward.
- بما أن القصة مترابطة بشكل كبير بين كل الأجزاء، صار صعب على اللي ما لعب كل الأجزاء انه يفهم وش اللي صاير، حتى انا اللي متابع من الجزء الأول بديت أضييع، تمنيت يحطون شرح مختصر و يذكرونا وش صار كمقطع إفتتاحي سريع.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
أساسنز كريد 4 سوت تغيير مهم كانت السلسلة في حاجة له، خصوصاً أن كثير من الناس بدأوا يحسون أن السلسلة صارت مجرد تكرار و حلب. أما هذا الجزء دمج لي حاجتين أحبها: القراصنة و الأساسنز، البعض ممكن يقول أنه المزيج هذا مب راكب و نظريا ممكن أتفق معهم، لكن في أرض الواقع Ubisoft قدرت تطلع بنتيجة رائعة.
ألعاب مشابهة
- Batman Arkham Origins (من ناحية أسلوب التخفّي)
- Hitman Absolution (من ناحية أسلوب التخفّي)
فيديو اللعبة
