آآآه بس الفضاوة وما تفعل، فيه باحثيين فاضيين ما عندهم شغل الظاهر قررو يسوون دراسة لتحديد آمن مكان ممكن الواحد يتخبى فيه في حال صار هجوم زومبي من جد لا سمح الله.
صاحبنا Alex Alemi هو واحد من هالمجموعة الفاضية اللي تسوي ابحاث وإحصائيات طور برنامج تفاعلي لكيفية تفشي عدوى الزومبي بطريقة علمية. في هذا البرنامج يقدر الشخص يختار منطقة ينتشر فيها المرض ويشوف كيف تنتشر في الخريطة. الخريطة فيها أدوات تخليك تحدد سرعة إنتشار المرض زي زيادرة نسبة العضة إلى الموت “bite-to-kill” وخيار تحديد سرعة مشي الزومبي.
يقول Alex أن إنتقال العدوى ياخذ سنين عشان ينتشر عالميا عكس ما يعرض في الأفلام والمسلسلات. ويقول Alex:
“مثلا مدينة نيويورك بينتشر فيها المرض بالكامل في كم يوم لكن في مدينة Ithaca المكان اللي أسكن فيه بياخذ الموضوع أسابيع عشان الزومبي يوصلون لين هنا. بيكون الوضع وكأنك وسط أحد الأحداث الفوضوية اللي تشوفها في التلفزيون”.
المشكلة خوينا Alex مصدق أن هجوم الزومبي بيقتلنا كلنا في النهاية وإقترح خطة قصيرة المدى للنجاة بحيث نقعد في أماكن بعيدة قدر الإمكان عن المدن الكبيرة. عاد يمدحون المزاحمية يقولون آمن من الرياض.
وش رأيكم شباب في كلام عالمنا العظيم Alex وكلامه الخطير عن الزومبي؟ شاركونا ضحكاتكم تحت في التعليقات.
