أنباء عن "أعطال" في البلاي ستيشن 4! وسوني تقول: نبي نتحقق من الموضوع!

قبل ساعات، بدأت سوني باجتياح بيوت الأمريكان بجهازها الجديد بلاي ستيشن 4. سوّت سون حفل اطلاق خاص بالبلاي ستيشن 4، وأعلنت عن بعض الأشياء الرهيبة. شفتها؟ سوينا تغطية عنها هنا.

لكن مع اطلاق أي منتج تقني، فيه ناس كثيرة تتخوف من هذا المنتج يكون فيه عطل تصنيعي أو تقني ماحد يدري عنه. واللاعبي عندهم خبرة بهذا الموضوع، من أشهرها اللمبة الصفرا للبلاي ستيشن 3 واللمبة الحمرا للاكس بوكس 360، واللي تعطل جهازك بالكامل ولا تقدر تستخدمه بعد كذا.

اليوم فيه أنباء عن أعطال في بعض نسخ البلاي ستيشن 4 اللي انباعت، من المشاكل المتكررة اللي تكلموا عنها الناس كانت مشكلة في سلك الـHDMI اللي تشبكه من البلاي ستيشن الى التلفزيون. موقع IGN الأمريكي قال ان البلاي ستيشن 4 حقه توقف عن عرض الصورة على التلفزيون بعد ما بدأ يسوي تحميل للبرنامج المعروف Netflix، وانهم حاولوا يلصحون الجهاز بشتى الطرق المعتادة مثل اعادة تشغيل الجهاز وغيرها، ولكنه ما اشتغل. تواصلوا مع سوني وجاهم واحد واعطاهم جهاز جديد وأخذ الجهاز القديم. قالوا آي جي إن انهم كانوا يشعرون ان سوني تبي تاخذ الجهاز الخربان عشان تعرف وش مشكلته.

. برضو موقع Kutaku الأمريكي قال ان البلاي ستيشن 4 اللي وصلهم جا معه سلك HDMI خربان. غير هذا، عضوين من موقع NeoGaf المعروف قالوا انهم واجهوا مشاكل في عرض الصورة على تلفزيوناتهم.

واحد من العضوين حقين نيوجاف اتصل بسوني وبلغهم بالمشكلة، وسوني تعاونت معه بشكل مباشر وأرسلت له بلاي ستيشن 4 بديل. كان مبسوط من سرعة تعاون سوني معه حسب كلامه.

تكلم على تويتر بعدها شوهي يوشيدا (Shuhei Yoshida) رئيس سوني وقال:” تطمنوا ياجماعة الخير، حنا الحين نحقق في مشاكل البلاي ستيشن 4. نسبة العطل قليلة جداً، الظاهر والله العالم انها مجرد حالات شاذة”.

تواصلت سوني بعدها مع موقع آي جي إن وقالوا لهم: “فيه ناس قالت انها تواجه مشاكل في البلاي ستيشن 4، وهذا شي متوقع وطبيعي بما انه منتج جديد، وترا أكثر الناس ما واجهتهم أي مشكلة في أجهزتهم وانهم مبسوطين مرة مع أجهزتهم. حنا جالسين نتابع التقارير أول بأول، ونعتقد ان حالات الأعطال هذي مجرد حالات شاذة”.

برضو من ضمن كلام سوني: “وصلتنا تقارير عن بعض المشاكل، واكتشفنا من هذي التقارير ان المشكلة نسبتها ضئيلة. نسبة حالات الأعطال هذي أقل من 4%! وهذا شي طبيعي وحنا متوقعين ان فيه نسبة مشاكل بسيطة ممكن تظهر مع أي جهاز جديد”.

حسب التقارير اللي قريتها، أعتقد ان المشكلة بسيطة وان كلام سوني صحيح. نسبة الأعطال ضئيلة جداً حسب كلام سوني، وهذا شي طبيعي مع أي جهاز جديد ينزل. أمس اشتريت جوّال جديد، لقيت فيه مشكلة بسيطة في الكاميرا، بحثت عنها في الانترنت واكتشفت انها مشكلة راح تنحل قريباً.

وش رايك انت في موضوع الأعطال هذا؟ هل تتوقع انه بيأثر على قرار شرائك للبلاي ستيشن 4 اذا نزل عندنا؟ شاركنا برأيك في التعليقات!