محمد الشريف
في مقابلة مع أحد مسؤولي شركة يوبيسوفت، صرح كريس ايرلي ان اللاعبين الآن ما يمسكون نفسهم عن شراء الاضافات اللي تنزل للألعاب (DLC)، بعد ما كانوا يمتنعون عن شراءها.
يقول كريس ان الناس تقريباً ما اشتكت من وجود اضافات مثل اضافة Time Saver في Assassin’s Creed IV: Black Flag واللي تكتشف للاعب أماكن الفلوس وموارد ثانية يستفيد منها، على ان بامكانه يكتشف هالاماكن بنفسه.
يقول كريس: “ما كان فيه أي صمود من قبل اللاعبين تجاه هذا الموضوع. يمكن شفنا 12 لاعب قالوا شي، لكن بشكل عام ما شفنا أي مشكلة”.
تكلم كريس عن انواع الاضافات، يقول: “أعتقد ان فيه أنواع يتقبلونها الناس. الاضافات العادية مقبولة جداً، سيزون باس (مبلغ تدفعه يفك لك كل الاضافات المستقبلية اللي بتنزل للعبة) مقبول جداً. بالنسبة للي اشتروا سيزون باس عندنا، فحنا نسوي لهم أحداث خاصة فيهم. هي مختلفة شوي عن الاضافات العادية، وهذا فيه نوع من التطوّر (يقصد سيزون باس نسخة مطوّرة من الاضافات العادية).
أعتقد ان كلامه صحيح، على انه ممكن تكون حقيقة مؤسفة. فيه ألعاب كثير استغلت سالفة الاضافات مثل EA مع Mass Effect ويوبيسوفت مع واحد من أجزاء أساسنز كريد (اللي شالوا منه تشابتر كامل) وغيرها. اللاعبين زعلوا على الشركات هذي لكن الآن الأمر صار طبيعي.
عموماً، مو كل الاضافات سيئة. فيه اضافات تحسها من جد اضافة للعبة.
وش رأيكم بالاضافات؟
احمد خالد
