نادراً ما تلقى مدرّس ممكن يطلع عن المألوف في سبيل أنه يوصّل المعلومة بشكل أفضل لطلّابه، زي المدرّس النرويجي اللي بنتكلم عنه.
المدرّس هذا قرّر يستعين بلعبة The Walking Dead في الفصل في درس عن الأخلاقيات. اللي مايعرف هذي اللعبة فهي ببساطة لعبة تحطّك في مواقف كثيرة تكون مجبور تتّخذ قرارات مصيرية فيها تأثر على سير القصّة، ومصير شخصياتها، وطبيعة علاقتهم معك.
الطريقة اللي استخدم فيها اللعبة هو أنه يخلي الطلاب يلعبونها على البروجكتر في الفصل، وكل ما يجي وقت لازم يتّخذون فيه قرار يوقّفون اللعبة، ويبدون يناقشون القرارات المتاحة من الناحية الأخلاقية (وش الأفضل فيهم)، والآثار مترتبة عليها. لأن تجيك قرارات صعبة جداً في اللعبة مافيها صح أو خطأ، مثل انها تخيّرك بين انك تنقذ طفل أو رب أسرة، هل تنفذ الطفل الضعيف اللي ما امداه يتهنّى بحياته؟ أو تنقذ رب الأسرة عشان يصرف على أسرته؟ (كمثال فقط)
المدرّس الرهيب يقول أنه استخدم هالطريقة لأنها تزيد مشاركة الطلاب في الفصل، وأنه حتى الطلاب اللي يجلسون بالأخير وما يشاركون عادة صاروا يتحمّسون معه ويسألونه متى يلعبون.
طبعاً اذا كنت طالب لا تحلم بأي شي زي كذا. نظامنا التعليمي يحرص بشكل كبير انك تموت من الطفش في الفصل على أساس انه “أوه ترانا في مدرسه في مكان طلب علم ولازم نصير جادّين”. لكن اتمنّى صراحة مدارسنا تتوجّه شوي للترفيه اللي يحبّونه الطلاب عادة، سواءً أفلام أو ألعاب الكترونية. ما يضر الواحد ينبسط ويتعلّم بنفس الوقت، صح؟
