أحمد قربان
مايكروسوفت (Microsoft) اعلنت اشياء رهيبة جدا راح تصير للتحديث القادم للاكس بوكس ون (Xbox one) و اكس بوكس 360، التحديث راح ينزل بكرة! اهم خبر هو انه من بكرة راح يكون مسموح لك انك ترفع مقاطع لعبك على اليوتيوب (Youtube) مباشرة من الاكس بوكس ون، بعد التحديث راح تلقى بجانب برنامج اليوتيوب في الجهاز اختيار ماي ابلودز (My uploads) من هناك راح تقدر ترفع مقاطعك وكمان تقدر تعدل المقطع وتسوي له مونتاج على كيفك وترفعه. ومن مصدر ثاني يقول انه تقدر ترفع من خيار مشاركة المقاطع (Share media) وبعدها اختيار مشاركه عبر المواقع الاجتماعية راح تلقى اختيار اليوتيوب. و ايضا مداك تحط قائمه فيها مقاطع تشوفها لما تفضى و تقدر كمان تشوف نبذة من المقاطع. واخر شي راح يكون في اشيفمنتز (Achievements) للاشياء اللي تسويها في برنامج اليوتيوب.
بالنسبة لجمهور الاكس بوكس 360، اعلنوا عن برنامج اسمه قو برو (GoPro app) هذا البرنامج راح يسمح لك تبث مباشرة من الجهاز بجودة عالية وراح يعرض لك مقاطع و اشياء جديدة وحديثة وراح يكون مع التحديث في مقطعين حصريين فقط لمالكين الاكس بوكس 360 و راح يكونوا اول من يشوفو هذي المقطعين. والبرنامج راح يخليك تعرض المقاطع حسب تصنيفها، مثلا رياضة، مغامرات وكدة. المشكلة في هذه الخدمه انه لازم تكون مشترك في خدمة اكس بوكس لايف قولد (Live gold) وطبعا هذا التحديث بكرة راح ينزل ايضا.
مايكروسوفت سمعو كلام عشاقهم في البداية بالسماحية لهم بالبث في شهر مارس، وكانت الاحصائيات مذهلة بحيث انه تم نشر 108 الف مقطع بث قي اول اسبوع فقط! ودحين مع امكانية رفع المقاطع على اليوتيوب راح تكون هذه الميزة هي الخدمة المتكاملة لاي لاعب. المشكلة كانت انه اجهزة الالعاب ماتقدر ترفع مقاطع على اليوتيوب بسبب انه الشخص اللي يبغا يرفع او اللاعب مجهول الهوية، لكن هذه المشكلة ماعاد حتكون موجودة بعد اليوم في الاكس بوكس ون.
صراحة هذي ميزة قوية جدا وانا شخصيا اتمنى انها تكون عندي، ميزة راح تفرق كثييير بين جهاز بلايستيشن 4 (PS4) والاكس بوكس ون. اتمنى يتم تطبيقها على البلاي ستيشن 4. ومبروك لكم ياعشاق الاكس بوكس.
اش رايك هل تشوف انه يفرق معاك التحديث ورهيب ولا انت اصلا مو مهتم باليوتيوب والبث وتشوف انه كلام فاضي؟ اعطينا رايك المؤثر.
احمد خالد
بارعة
Saudi Gamer
