جيل انتهى و جيل جديد بدأ،أو علشان نكون دقيقين أكثر بنقول جيل “قرّب” ينتهي و جيل جديد بدأ، جيل استمتعنا فيه بكل جوانبه، شركات كثيرة تعلمت من أخطاءها بهالجيل، صناعة الألعاب ارتفعت بهالجيل، معايير التطوير ارتفعت، تكاليف النشر و التطوير تضاعفت بشكل كبير، استديوهات نجحت بهالجيل و اخرى فشلت، لكن كلنا نتفق اننا استمتعنا بهالجيل.
بهالمقالة بناخذ جانب واحد بنتكلم فيه يخص الجيل الحالي و الجيل الجديد، اخترت جانب معين لأن فعلا اعتبره نقله بتفكير المطورين و قناعاتهم و معاييرهم، طبعا اللي ساعدهم بكل تأكيد هو قدرات الجيل الجديد اللي خلتهم يقدرون ياخذون راحتهم و يبدعون أكثر و يضيفون كل اللي كانوا مو قادرين يضيفونه بألعابهم على الجيل الحالي. بهالمقالة أبتكلم ان كيف شفنا ثورة ألعاب التصويب (Shooter Games) بعز مستواها و كيف ان هذا النوع من الألعاب قدروا المطورين يرفعون مستواه و يوصل الى شريحة أخرى و كبيرة من اللاعبين، لكن بنفس الوقت كان لهالشئ مساوء كثيرة علينا كلاعبين و على الاستديوهات و الناشرين برضو. برضو بنتكلم بهالمقالة انه كيف ألعاب الجيل القادم من بدايته بدأ بألعاب نشوف فيها عالم مفتوح كبير غني بمحتواه و ثري بتفاصيله.
الجيل الحالي شفنا كيف ثورة ألعاب التصويب، و كيف انه كثير من الاستديوهات طمعت ان يكون لها حصة من هالسوق من الألعاب، بعضهم ويمكن أغلبهم بعد فشل و للأسف خسر اسم لعبته، و بعضهم بالعكس قدر يدخل هالسوق و ينافس فيه و ياخذ حصة منه. لعبة زي كول أوف دوتي (Call of Duty) بأجزاءها السنوية تحقق أرباح مهوله! ما راح اتكلم عن رايي الشخصي باللعبة لأن موب هذا موضوعي، هاللعبة قدرت تستحوذ على حصة الألعاب الشوتر بهالجيل بشكل مخيف، تنافسها باتلفيلد (Battlefield) اللي كانت تبي تاخذ جزء من حصة Call of Duty و قدرت على هالشئ، ذكرت هاللعبتين لانهم على رأس ألعاب الشتور بهالجيل من ناحية الشعبية و المبيعات. هالمبيعات الكبيرة خلت بعض المطورين يطمعون و يحاولون يجذبون هالشريحة من اللاعبين لعل و عسى يرضي فيها الأسودويو الناشر اللي قاعد فوق راسه يبي اللعبة تنجح بأي طريقة، ابسط مثال ممكن يفهمه أبسط اللاعبين هو رزيدنت ايفل (Resident Evil)، هاللعبة اللي لها شعبية كبيرة و قاعدة جماهير عريضة، بالجزء الخامس من اللعبة تغيرت كثير من أفكار اللعبة، صارت عناصر التصويب باللعبة كثيرة، هالشئ ضايق كثير من اللاعبين خصوصا عشّاق السلسلة، لكن بالنهاية قالها الاستوديو و بكل صراحة ان سوق الألعاب و توجه اللاعبين لألعاب الشوتر هو اللي خلانا نتغير بهالشكل مع الجزء الخامس، للعلم انه الجزء الرابع كان بنفس الأسلوب، لكن ما شفنا بالرابع عناصر ألعاب الشوتر المركزة زي الخامس، بالنسبة لي استمتعت بالخامس ولا عندي مشكلة لأني مو من عشاق اللعبة، لكن أتفهم و أتعاطف بشكل كبير مع عشاق اللعبة.
ننتقل الآن لألعاب الجيل القادم، و كيف ان الجيل القادم بدأ بألعاب العالم المفتوح من بدابة الجيل، عناصر كثيرة ساعدة على هالشئ من ضمنها إن امكانيات الأجهزة تقنيًا تسمح للمطور إنه ياخذ راحته و يلقى المنصة اللي يقدر يطلع فيها كل الأفكار اللي براسه. لعبة زي ديد رايزينج 3 (Dead Rising 3) شفنا كيف حجم العالم المفتوح باللعبة، و كف تتنقل بين مناطق اللعبة بطرق مختلفة. لعبة زي ديستيني (Destiny) من أكثر الألعاب اللي أنتظرها شخصيا، لعبة فيها عالم مفتوح رائع! عالم مفتوح متنوع و أعداء مختلفين، لعبة بتعطينا تجربة رائعة لألعاب الشوتر اللي كانت محدودة جدا و سيئة بالنسبة لي بأغلب ألعاب الجيل الحالي. برضو من أكبر الأمثلة اللي ممكن نذكرها بهالنقطة هي ميتال جير سوليد (Metal Gear Solid) سواء جراوند زيروز (Ground Zeroes) ولا ذا فانتوم بين (The Phantom Pain )، لعبة انتقلت كليا إلى لعبة عالم مفتوح و تخفي بشكل رائع، هذا المثال يعطينا تصور إنه كيف المطور لقى المنصات الترفيهية اللي تعطيه قدرات و قوة تقنيّة تسمحله يخلي لعبته فيها عالم مفتوح كبير، ولا مين كان يتصور ان كوجيما (Hideo Kojima)بيروح للطريق هذا. هذا الشي من مصلحتنا أولا و أخيرا كلاعبين، ألعاب العالم المفتوح تعطينا تجربة مختلفة بكل تاكيد، انا مؤمن بهالشي مع تجارب كثيرة بالجيل الحالي. امثلة كثيرة للجيل القادم نذكرها بهالنقطة زي ووتش دوجز (Watch Dogs) – ميرورز إيدج (Mirror’s Edge) – ذا ديفيجن (Tom Clancy’s The Division)، هذي أمثلة لألعاب جديدة علينا من ناحية انها بتكون عالم مفتوح، اما باقي الألعاب تعودنا انها تكون عالم مفتوح لكن الرهيب بالموضوع إنها جت مع بداية الجيل الجديد بعكس الجيل الحالي اللي تأخرت الألعاب لين شفناها بدت تهتم بالعالم المفتوح.
الآن مع هالتركيز بهالنوع من الألعاب للجيل القادم و خصوصا للألعاب اللي أضافت عنصر العالم المفتوح لألعابها للجيل القادم, هل فعلا كل اللاعبين جاهزين لهالشئ؟ هل فيه تقبّل لهالشي ولا ما يزال يحتاجون المطورين إنهم يقنعون شريحة من الناس بجمالية ألعاب العالم المفتوح؟ هل فعلا الألعاب اللي يكون طور القصة فيها قصير و سعرها 60 دولار ولا تحس انها تستاهل ممكن وجود عالم مفتوح باللعبة بيغيّر قرارك؟
