أطلقت قناة بلايستيشن اليوم أول عرض للعبة العالم المفتوح Mad Max. تأخّر العرض شوي لكن تقدر تقول انه يستاهل الانتظار.
لعبة ماد ماكس، هي لعبة تصير أحداثها بعد كارثة (غالباً بسبب حرب نووية تدمّر بسببها العالم وهالسوالف) في بيئة مفتوحة. تتميّز اللعبة بميكانيكية قتال السيارات.
العرض فيه أشياء كثيرة مره، بأحاول أسرد أهمها على شكل نقاط:
- تركيز كبير على الانفجارات في اللعبة، فالظاهر انها بتكون مثل لعبة Just Cause (من نفس المطوّر) تقدر تفجّر أشياء كثير.
- يمديك تضبّط وتغيّر في السيارات، بحيث تقدر تغير الصدّام مثلاً.
- بالاضافة الى تغيير الشكل، بامكانك تحسّن وتقوّي سيارتك بحيث تركب عليها قطع تخليها أقوى من ناحية الأداء.
- تقدر تغيّر وتضبط في الشخصية اللي تلعب فيها، بحيث تركّب فقازات حديدية تتضارب فيها مع الأعداء،
- فيه تركيز كبير على القتال اليدوي ضد الأعداء، تقدر تلاحظ المضاربات اللي تصير في المقطع. تقدر تشبهها بالقتال الرهيب اللي شفناه في لعبة Sleeping Dogs. أو حتى مثل طريقة قتال سلسلة Batman.
- تقدر تحسّن قدرات شخصيتك، مثل تحسين استخدام الشخصية لبعض الأسلحة في اللعبة.
- تقدر تاخذ قطع وأدوات في عالم اللعبة وتسحبها الى بيتك (أو قاعدتك) وتستخدمها لتحسين سيارتك أو غيره.
بتنزل لعبة ماد ماكس على بلايستيشن 4، اكس بوكس ون، بي سي في 4-9-2015.
وش رأيكم في العرض؟
