بعد الهجمات الشنيعة على شبكات اكس بوكس لايف وبلايستيشن واللي تسببت بتوقف الشبكتين بالكامل، أعلنت مجموعة ليزارد (Lizard Squad) عن أسباب هجومها على الشبكات.
شبكة اكس بوكس لايف رجعت تعمل اليوم، على ان فيه مجموعة من اللاعبين ماهم قادرين يشبكون ولا زالوا يواجهون مشاكل. شبكة بلايستيشن لا زالت متعطلة ولا تقدر تدخل المتجر أو تلعب أونلاين.
عشان يكون القارئ على علم، مافيه شي يؤكد ان مجموعة ليزارد هم اللي فعلاً قدروا يعطلون الشبكات، ولكن المجموعة تدّعي انها ورا الهجمات هذي. سوني ومايكروسوفت صرحوا انهم واعين بالمشاكل اللي تصير، ولكن ما قالوا وش السبب. الملفت للنظر ان المجموعة أعلنت عن خطّتها لتعطيل شبكة اكس بوكس لايف وبلايستيشن نيتوورك قبل عيد الكريسميس بشهر كامل، وفعلاً تعطلت الشبكتين.
أعلنت المجموعة عن ايقاف هجومها على الشبكتين، وذكروا السبب الغريب اللي خلاهم يوقفون الهجوم، لكن لا زالت الشبكتين تواجه مشاكل. اكس بوكس لايف رجعت للكثير من اللاعبين، وشبكة بلايستيشن لا زالت متوقفة باستثناء بعض اللاعبين.
بالنسبة للأسباب، فالمجموعة تقول انها سوّت الهجمات هذي عشان تثبت للناس مدى “بلادة وعدم كفاءة” سوني ومايكروسوفت. يقول واحد من المجموعة:
” سوني ومايكروسوفت أغبياء، حرفياً هم عبارة عن قرود خلف الشاشة. كان بامكانهم يسوون أفضل من كذا لو وظّفوا ناس يعرفون يشتغلون زين. لو اني أشتغل في وحدة من هالشركتين وعندي فلوسهم كان بامكاني أوقّف هالهجمات بالراحة. الشغلة كلها متعلقة بالبرمجة لا أكثر.”
في مقابلة ثانية، سألوا واحد من المجموعة هل هو يشعر بالأسف أو الحرج من الشي اللي سواه، ولكن رد عليهم وقال لو كان يشعر بالأسف للي سوّاه كان اعتذر، لكنه ما راح يعتذر.
مجموعة ليزارد مقتنعة تماماً ان الشي اللي يسوونه هذا ” بيستفيد منه الكل على المدى البعيد”. لامت المجموعة اللاعبين اللي يدافعون عن سوني ومايكروسوفت، وكتبوا في حسابهم على تويتر هالكلام:
” هذي الشركات تكسب مليارات الدولارات من ظهوركم، وفوق هذا كلّه ما يدفعون الضرائب، وجايين تدافعون عنهم؟ افتحوا عيونكم”.
بامكانك تقرا المقابلة بالكامل. متى ما صار فيه أي تحديث عن الشبكتين بنكتب في الموقع، كونوا معنا!
وش رأيك في كلام المجموعة؟
